ខេត្តកណ្ដាល៖ ជនសង្ស័យម្នាក់ឃើញម៉ូតូប្រជាពលរដ្ឋមួយគ្រឿងទុកនៅកន្លែងស្ងាត់មើលទៅទំនងក៏ធ្វើសកម្មភាពលួច យកតែពុំបានសម្រេចត្រូវបានម្ចាស់ម៉ូតូនិងប្រជាពលរដ្ឋជិតខាងឃើញទាន់ក៏នាំគ្នាដេញចាប់ឃាត់ខ្លួនប្រគល់ឲ្យសមត្ថកិច្ចចាត់ការតាមច្បាប់។
ករណីនេះបានកើតឡើងកាលពីថ្ងៃទី២៣ ខែឧសភា ឆ្នាំ ២០២០ វេលាម៉ោង១៨ស្ថិតក្នុងភូមិថ្មី ឃុំ រលាំងកែន ស្រុកកណ្ដាលស្ទឹង ខេត្តកណ្ដាល។
មន្ត្រីនគរបាលស្រុកកណ្ដាលស្ទឹងបានឲ្យដឹងថា ជនសង្ស័យដែលប្រជាពលរដ្ឋ ឃាត់ខ្លួនបានឈ្មោះ ម៉ៅ សុភ័ក្រ្ត ភេទប្រុស អាយុ២៨ឆ្នាំ ជនជាតិ ខ្មែរមុខរបរ មិនពិតប្រាកដ មានទីលំនៅភូមិស្កូវ ឃុំត្រពាំងគង ស្រុកសំរោងទង ខេត្តកំពង់ស្ពឺ។ ចំណែកម្ចាស់ម៉ូតូរងគ្រោះឈ្មោះ សយ ញ៉ក់ ភេទប្រុស អាយុ៣៨ឆ្នាំ មានទីលំនៅភូមិថ្មី ឃុំរលាំងកែន ស្រុកកណ្ដាលស្ទឹង ខេត្តកណ្ដាល ។ រីឯវត្ថុតាងដកហូតបានមាន ម៉ូតូ១គ្រឿង ម៉ាកហុងដា គុបជ្រុង ធុនសេ៩០ ពណ៌ទឹកប៊ិច ពាក់ស្លាកលេខ ភ្នំពេញ1L-7604(របស់ជនរងគ្រោះ)។
ប្រភពដដែលបន្តថា កាលពីថ្ងៃខែឆ្នាំកេីតហេតុខាងលើ វេលាម៉ោង ១៧និង៣០នាទី កូនប្រុសរបស់ជនរងគ្រោះឈ្មោះ សន យ៉ារី បានជិះម៉ូតូមួយគ្រឿង ចេញពីផ្ទះទៅរកអុសនៅកន្លែងកើតហេតុដោយទុកម៉ូតូនៅកន្លែងស្ងាត់ ហើយក៏ទៅរកអុសបាត់ទៅ ។ ពេលរកអុសបានហើយក៏មកយកម៉ូតូរបស់ខ្លួនវិញស្រាប់តែមិនឃើញ ក៏មកប្រាប់ឪពុកខ្លួនថា ចោរលួចម៉ូតូបាត់ហេីយ ភ្លាមៗនោះបងប្អូននិងប្រជាពលរដ្ឋនាំគ្នាជិះម៉ូតូដើររកមើលស្រាប់តែឃើញជនសង្ស័យកំពុងបណ្ដើរម៉ូតូរបស់ខ្លួនដែលបាត់នោះចូលទៅក្នុងដីឡូត៍មួយកន្លែងស្ថិតក្នុងភូមិកើតហេតុខាងលើ ទើបជនរងគ្រោះនិងអ្នកភូមិដែលនៅលេងបាល់នៅក្បែរនោះនាំគ្នាឃាត់ជនសង្ស័យខាងលើ ប្រគល់ឲ្យសមត្ថកិច្ចប៉ុស្តិ៍នគរបាលរដ្ឋបាល រលាំងកែន រួចបានបញ្ជូន ជនសង្ស័យមកកាន់អធិការដ្ឋានដើម្បីចាត់ការតាមនីតិវិធី៕ដោយ៖ស្អាង ជ័យ
