បើទោះបីជាអង្គភាពប្រឆាំងអំពើពុករលួយធ្លាប់បានចាប់មន្ដ្រីនគរបាល សេដ្ឋកិច្ចនៃស្នងការដ្ឋាននគរបាលរាជធានីភ្នំពេញប្រព្រឹត្ដអំពើពុករលួយ២ នាក់ដាក់គុកដើម្បីជាការព្រមានរួចហើយយ៉ាងណាក៏ដោយក៏ពួកគេញញើតនឹង ដើរប្រមូលប្រាក់ពីបទល្មើសប្រសេចប្រសាចដូចគោហ្វូង ។ ជំនាន់លោក ពិត បញ្ញា ហាក់ដូចជាមានរបៀបរៀបរយគួរសមចូលមកដល់ជំនាន់លោក យឹម សុជាតិ នាយការិយាល័យប្រឆាំងបទល្មើសសេដ្ឋកិច្ចពេលនេះគឺអនាធិបតេយ្យហួស ហេតុច្រើនក្រុមច្រើនបក្ខពួក ។
ប្រភពរាយការណ៍ថា សព្វថ្ងៃនេះក្រុមនគរបាលសេដ្ឋកិច្ចច្រើនផ្នែកច្រើនមុខ ព្រួញត្រូវបានចាត់តាំងឱ្យដើរយកប្រាក់យ៉ាងប្រសេចប្រសាចដើរយកលុយតាម ដេប៉ូឈើ, សិប្បកម្មឈើ, ដើរយកលុយពីហាងលក់ទំនិញ, លក់ថ្នាំពេទ្យ, គ្រឿង សម្អាង ក្រុមលោក សោម មុនី ដើរប្រមូលលុយពីក្រុមហ៊ុន រោងចក្រសហគ្រាស សិប្បកម្មគ្រប់កន្លែង ។ ក្រុមលោក ជុំ ណារ័ត្ន ដើរប្រមូលយកប្រាក់ពីក្រុមហ៊ុនដឹក ទំនិញតាមកុងតឺន័រ ។ ក្រុមលោក មាស វុទ្ធី ទទួលបន្ទុកខាងវិនិយោគ… នៅមាន ក្រុមប្រតិបត្ដិការប្រចាំថ្ងៃដែលដើរប្រមូលយកប្រាក់និងក្រុមប្រដេញនោះទៀតផង។ បទល្មើសកើតពេញបន្ទុក ប៉ុន្ដែពួកគេចាប់បទល្មើសតែថៅកែមិនបង់ប្រាក់ ។ ប៉ុន្ដែ ពេលខ្លះពួកគេតម្រូវឱ្យបង់ប្រាក់ច្រើនហួសហេតុ ។
ពេលខ្លះពួកមន្ដ្រីនគរបាលទាំងនោះនិយាយថា រកស៊ីខាតដែលតម្រូវឱ្យឈ្មួញ ចាំបាច់ត្រូវបង់បន្ថែមពីចំនួនដែលធ្លាប់បង់រាល់ខែ ។ ករណីនេះត្រូវបានគេដើរ និយាយថា ព្រោះតែមេថ្មីគឺលោក យឹម សុជាតិ មានតម្រូវការខ្ពស់ ។ គេមិនដឹង ថា តើលោក យឹម សុជាតិ បង្ខំឱ្យកូនចៅដើរទារលុយពីឈ្មួញស្រេចតែអំពើចិត្ដ ឬ យ៉ាងណានោះទេ ។
ពួកមន្ដ្រីនគរបាលសេដ្ឋកិច្ចក្រុងខ្លះថែមទាំងប្រើឈ្មោះលោកស្នងការ ជួន សុវណ្ណ គំរាមឈ្មួញទៀតផង ។ គេមិនដឹងថា តើថ្នាក់ដឹកនាំមន្ដ្រីនគរបាលលោក ជួន សុវណ្ណ និងលោក យឹម សុជាតិ បេញ្ជាឱ្យកូនចៅចេញរកប្រាក់របៀបនេះមែន ឬយ៉ាងណាទេ? ៕
