អាមេរិក៖ កាលពីថ្ងៃសុក្រទី២៩ ខែឧសភា ព្រះរាជអាជ្ញាក្នុងតំបន់ បានប្រកាសថា អតីតប៉ូលីសស្បែកសម្នាក់ នៅទីក្រុង Minneapolis សហរដ្ឋអាមេរិក ដែលធ្វើឲ្យលោក George Floyd ជនជាតិស្បែកខ្មៅម្នាក់ បានស្លាប់នោះ ពេលនេះត្រូវបណ្ដេញចេញពីការងារ និងត្រូវបានចោទប្រកាន់ពីបទមនុស្សឃាត និងឃាតកម្មកម្រិតទី ៣ លើការស្លាប់មនុស្ស ។

គួរបញ្ជាក់ថា កាលពីថ្ងៃចន្ទកន្លងទៅ ជន Derek Chauvin ត្រូវបានគេឃើញបានផ្ទប់មុខលោក George Floyd អាយុ ៤៦ឆ្នាំ ទៅនឹងដីដោយប្រើជង្គង់សង្កត់ពីលើ ទោះបីជាពេលនោះជនរងគ្រោះនិយាយថា គាត់មិនអាចដកដង្ហើមបានក៏ដោយ។ ឧប្បត្តិហេតុនេះបានបង្កឱ្យមានការរំជើបរំជួលជាច្រើនថ្ងៃនៅទីក្រុង នៅពេលដែលក្រុមអ្នកតវ៉ាបានចូលលួចក្នុងផ្សារទំនើប និងបានដុតបំផ្លាញប៉ុស្តិ៍ប៉ូលីស ។

ព្រះរាជអាជ្ញាក្នុងតំបន់ បានបញ្ជាក់ថា ជន Derek Chauvin គឺជាមន្ត្រីម្នាក់ក្នុងចំណោម ៤នាក់ ដែលស្ថិតនៅកន្លែងកើតហេតុ ហើយពួកគេទាំងអស់ត្រូវបានគេបណ្តេញចេញពីការងារ ខណៈអាជ្ញាធរកំពុងស៊ើបអង្កេតពីការចូលរួមរបស់អ្នកដទៃទៀត។

សូមជ្រាបថា ចាប់តាំងពីពេលនោះមកការតវ៉ាបានរីករាលដាលដល់ទីក្រុងធំៗចំនួន ៧ ផ្សេងទៀតរបស់សហរដ្ឋអាមេរិក ដែលរួមមានទីក្រុងLos Angeles ។ រីឯ Manhattan ក្នុងរដ្ឋញូវយ៉ក មនុស្សជាង ៤០នាក់ ត្រូវបានចាប់យកទៅឃុំឃាំង នៅក្នុងអំពើហិង្សារវាងប៉ូលីស និងអ្នកតវ៉ា៕ដោយ៖ស តារា