ខេត្តកណ្តាល៖ បុរសវ័យចំណាស់ម្នាក់បានស្លាប់យ៉ាងអណោចអធ័មនៅកន្លែងកើតហេតុ នៅគ្រាដែលជនរងគ្រោះដើរឆ្លងផ្លូវមិនប្រយ័ត្ន ក៍ត្រូវរថយន្តមិនស្គាល់អត្តសញ្ញាណបើកបុកចំពីមុខពេញទំហឹងតែម្តង ។

កាលពីវេលាម៉ោង៧ និង៤៥នាទីយប់ថ្ងៃទី១៩ ខែមករា ឆ្នាំ២០១៦ នៅលើកំណាត់ផ្លូវជាតិលេខ១ ចន្លោះគីឡូម៉ែត្រលេខ២០-២១ ភូមិចិនកោះ  ឃុំគគីរ ស្រុកកៀនស្វាយ ចេត្តកណ្តាល ។ បន្ទាប់ពីបុកមនុស្សហើយ រថយន្តបង្កបើកគេចបាត់តែម្តង ប៉ុន្តែករណីនេះសមត្ថកិច្ច ប្រាប់ថាមិនដឹងស្អីបុក ព្រោះគ្មានសាក្សីបញ្ជាក់អោយច្បាស់ ។

តាមប្រភពព័ត៍មានពីប្រជាពលរដ្ឋបានអោយដឹងថា មានរថយន្តមិនស្គាល់ម៉ាកបានធ្វើដំណើរក្នុងទិសដៅពីអ្នកលឿងទៅភ្នំពេញលុះមកដល់ត្រង់ចំណុចខាងលើបានប្រជែងរថយន្តកុងតឺន័រនៅពីមុខ ហើយក៍ជ្រុលទៅ បុកជនរងគ្រោះមានឈ្មោះកុយ សៀក ភេទប្រុស អាយុ៧៣ឆ្នាំ មុខរបរលក់ដូរ រស់នៅភូមិឃំុកើតហេតុ ចំពេញទំហឹងបណ្តាលអោយស្លាប់នៅកន្លែងកើតហេតុ។ ដោយឡែករថយន្តបានបន្ថែមល្បឿនគេចខ្លួនបាត់ស្រមោល។ ក្រោយពីកើតហេតុសមត្ថកិច្ចជំនាញចុះមកធ្វើការវាស់វែង និងបានប្រគល់សាកពជូនក្រុមគ្រួសារធ្វើបុណ្យតាមប្រពៃណី ។

លោកហង្ស ផាន់ណារ៉ា នាយផ្នែកសណ្តាប់ធ្នាប់ចរាចរស្រុកបានអោយដឹងថា អ្នកខ្លះថារថយន្តបុកស្លាប់ អ្នកទៀតថាអត់ច្បាស់ថាមានអ្វីបុកនោះទេ ដូច្នេះសមត្ថកិច្ចពិបាកសន្និដ្ឋាន ៕

ដោយ៖ សណ្តោស