ភ្នំពេញ៖ បុរសម្នាក់ទំនងជាងងុយដេក ងោកមួយផាំងបើករថយន្តកូរ៉េមួយគ្រឿង ដឹកផ្លែឈើពេញព្រៀបជ្រុលទៅបុកនឹងរបាំងថ្មពុះចែកទ្រូងផ្លូវខូចខាតចំនួន២កង់ ហើយរថយន្តបានក្រឡាប់ចាក់ផ្លែឈើពាសពេញផ្លូវរងការខូចខាតតែ សំណាងល្អមិនអ្នករងរបួស ។
ហេតុការណ៍នេះបានកើតឡើងកាលពីវេលាម៉ោង១នឹង១០នាទីរំលងអាធ្រាតឈានចូលថ្ងៃទី២១ ខែមករា ឆ្នាំ២០១៦ ខាងលិចផ្សារដើមគ តាមបណ្តោយផ្លូវម៉ៅសេទុង ស្ថិតក្នុងសង្កាត់ផ្សារដើមគ ខណ្ឌទួលគោក ។
ប្រភពពត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តកូរ៉េមួយគ្រឿងម៉ាកHYANDAI ចំណុះ2,5តោន ពណ៍ខៀវ ពាក់ស្លាកលេខ កំពង់ចាម 2A-0290 ដឹកផ្លែពេញប្រៀបលើរថយន្ត បើកតាមបណ្តោយផ្លូវម៉ៅ សេទុង ទិសដៅពីកើតទៅលិច ខណះមកដល់ចំណុចកើតហេតុដោយតៃកុងរថយន្តទំនងជាងងុយដេកងោកមួយភាំង បានជ្រុលទៅបុករបាំងថ្មពុះចែកទ្រូងផ្លូវខូចខាតចំនួន២កង់ ហើយរថយន្តបានក្រឡាប់ចាក់ផ្លែឈើពាសពេញផ្លូវរងការខូចខាត ប៉ុន្តែមិនបង្កឱ្យនណារម្នាក់រងរបួសនោះទេ ។
ក្រោយកើតហេតុសមត្ថកិច្ចជំនាញធ្វើការវាស់វែង និងយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕
ដោយ៖ ព្រែកជ័យ
