បាតុកម្មនៅអាមេរិក មានគ្រប់រូបភាព ទាំងបាតុកម្ម អហិង្សាផង ហិង្សាផង បាតុកម្មលុងជង្គង់ផង ដូចដែលប៉ូលិសប្រើជង្គង់សង្កត់ក ជនរងគ្រោះ ហើយនៅ​ពេលនេះក៏មានបាតុកម្មដេកផ្កាប់មុខវិញម្តង។
ក្រុមបាតុករ​រាប់សិបពាន់នាក់បាននាំគ្នាប្រមូលផ្តុំនៅលើស្ពាន Portlandដោយដេកផ្កាប់មុខរយៈពេល ៩នាទី ដៃដាក់លើខ្នង ដូចត្រូវជាប់ខ្នោះ ជាការនឹកដល់ពេលវេលា​ដែល បុរសស្បែកខ្មៅGeorge Floyd ត្រូវប៉ូលិសអាមេរិក​សង្កត់ ករហូតដល់ស្លាប់។
ជនរងគ្រោះ George Floyd ត្រូវប៉ូលិសសង្កត់កដេកនៅលើថ្នល់ជិត​៩នាទី​ បើទោះបីជនរងគ្រោះនិយាយថា​«ខ្ញុំមិនអាចដកដង្ហើមបាន»។ ការស្លាប់របស់​George Floyd​ជាការចាប់ផ្តើមឲ្យមានមហាបាតុកម្ម​កើតឡើងនៅទាំងអាមេរិក និងប្រទេសជាច្រើនផ្សេងទៀត​ដែលមានក្រុមជនជាតិស្បែកខ្មៅរស់នៅពិសេសគឺតំបន់អឺរ៉ុប​។
សហគមន៍អន្តរជាតិ ពិសេសគឺអ្នកនយោបាយជើងចាស់នៅអាមេរិក និង បណ្តាប្រទេសជាសម្ព័ន្ធមិត្តបានថ្កោលទោសយ៉ាងខ្លាំង ដល់ សកម្មភាពប្រើហិង្សាទៅលើបាតុករពិសេសគឺទៅលើក្រុមអ្នកសារព័ត៌មានទៀតផង​៕

ដោយ៖ធីរីណា