ខេត្តបាត់ដំបង ៖ សមត្ថកិច្ច បានចាត់វិធានការ ដុតបំផ្លាញចោល នូវចុងស្លាបមាន់- ឆ្អឹងមាន់ខូចគុណភាពដចំនួន១,២៩០គីឡូក្រាម ខណៈឈ្មួញនាំចូលដោយខុសច្បាប់។
ករណីនេះធ្វើឡើងនៅព្រឹកថ្ងៃ សុក្រ ៧រោច ខែ ជេស្ឋឆ្នាំជូតទោស័កព.ស.២៥៦៤ ត្រូវនឹងថ្ងៃទី ១២ ខែ មិថុនា ឆ្នាំ ២០២០ ដោយអនុវត្តតាមបទបញ្ជារបស់ លោកឧត្តមសេនីយ៍ទោ អ៊ុច សុខុន ស្នងការ នៃស្នងការដ្ឋាននគរបាលខេត្តបាត់ដំបង និងដោយអនុវត្តតាមបញ្ជារបស់លោក គឺ ប៊ុណ្ណារ៉ា ព្រះរាជអាជ្ញារងនៃអយ្យការអមសាលាដំបូងខេត្តបាត់ដំបង លោកឧត្តមសេនីយ៍ត្រី ចេង ឡេង ស្នងការរងផែនការងារប្រឆាំងបទល្មើសសេដ្ឋកិច្ចនៃស្នងការដ្ឋាន ដឹកនាំកម្លាំងនគរបាលក្នុងការិយាល័យជំនាញ ដែលមានលោកវរសេនីយ៍ទោ យី យក់សាន ជានាយការិយាល័យនគរបាលប្រឆាំងបទល្មើសសេដ្ឋកិច្ច ចូលរួមសហការណ៍ជាមួយសមត្ថកិច្ចជំនាញ អាជ្ញាធរមូលដ្ឋានពាក់ព័ន្ធ បានធ្វើពិធីដុតបំផ្លាញចោលនូវចុងស្លាបមាន់ និងឆ្អឹងមាន់ចំនួន១,២៩០គីឡូ នៅចំណុចទីលានចាក់សំរាម ក្នុងសង្កាត់ ស្លាកែក ក្រុងបាត់ដំបង ខេត្តបាត់ដំបង ។
សាច់ខូចគុណភាព ទាំងនេះសមត្ថកិច្ចនគរបាលចូលរួមជាមួយសមត្ថកិច្ចជំនាញរាំងស្កាត់បានពីក្រុមឈ្មួញដែលរកស៊ីនាំចូលដោយខុសច្បាប់នៅចំណុចឃុំតាគ្រាម ស្រុកបាណន់ ខេត្តបាត់ដំបង កាលពីថ្ងៃទី១១ ខែ មិថុនា ឆ្នាំ ២០២០ក្នុងខណៈក្រុមឈ្មួញនាំយកបម្រុងចរាចារណ៍លក់ដូរ ក្នុងមូលដ្ឋានខេត្តបាត់ដំបង។
ចំពោះករណីជនសង្ស័យ នាំចូលចុងស្លាបមាន់- ឆ្អឹងមាន់ខូចគុណភាព ត្រូវបានឃាត់ខ្លួន ឬយ៉ាងណា មិនមានការបកស្រាយពីសមត្ថកិច្ចនៅឡើយទេ៕
ដោយ៖ ស សម
