ខេត្ដសៀមរាប៖ ប្រជាពលរដ្ឋក្នុង ខេត្ដសៀមរាបព្រមទាំងភ្ញៀវទេសចរ ដែលបានឆ្លងកាត់តាមព្រះអង្គចេកព្រះ អង្គចមជាពិសេសកន្លែងដែលប្រជាពលរដ្ឋនាំគ្នាមកអុចធូបគោរពនៅមុខព្រះ ភ័ក្ដ្រលោកយាយទេពដើម្បីសុំសេចក្ដី សុខសេចក្ដីចម្រើន ។ ប៉ុន្ដែបែរជាឃើញស្ដ្រី ចំណាស់ម្នាក់បានស្លៀកសំលៀកបំពាក់ ព្រមទាំងមានពាក់ឆៀងដូចជាអ្នកចូល រូបមកអង្គុយមុខសំណាករបស់លោក យាយទេព ដោយតាំងខ្លួនឯងជាអ្នកស្នង រូបលោកយាយទេព ដើម្បីឱ្យគេគោរព តាំងពីល្ងាចដល់យប់ថ្ងៃទី១៩ ខែមករា ឆ្នាំ២០១៦ ស្ថិតនៅតាមបណ្ដោយផ្លូវ ជាតិលេខ៦ ក្នុងភូមិមណ្ឌល២ សង្កាត់ ស្វាយដង្គុំ ក្រុង-ខេត្ដសៀមរាប ។
តាមប្រភពពីពលរដ្ឋបាននិយាយរិះ គន់យ៉ាងខ្លាំងកាលពីថ្ងៃទី១៩ ខែមករា ថា ប្រហែលមកពីលោកស្នងការខេត្ដ និងលោក ឃឹម ប៊ុនសុង អភិបាលខេត្ដ មិនបានមើលពុំបានគិតថាមានរឿងបែប នេះកើតឡើងធ្វើឱ្យក្រុមអ្នកបារមីនិយម ដែលបានតាំងខ្លួនទៅធ្វើពិធីជាន់ឈ្លីលើរូប សំណាកលោកយាយទេពដែលជាកន្លែងទីសក្ការគោរពបូជារបស់ប្រជាពលរដ្ឋ ក្នុងខេត្ដសៀមរាប ។
តាមប្រភពបន្ដថា ចំពោះសមត្ថ កិច្ចដែលឈរយាមជុំវិញព្រះរាជដំណាក់ពេលឃើញមានមនុស្សតាំងខ្លួននៅមុខសំណាក់ព្រះភ័ក្ដ្រលោកយាយទេពហើយនាំគ្នាឈរមើលទៅវិញពុំមានវិធានការអ្វីទាល់តែសោះ ហើយសមត្ថកិច្ចនគរ បាលដែលយាមនៅកន្លែងព្រះអង្គចេក ព្រះអង្គចមនិងលោកយាយទេពនេះ បែរជានាំគ្នាដាក់ម៉ូតូនិងឡានយកលុយ ទៅវិញ ។
ទង្វើទាំងនេះជាការជាន់ឈ្លីទៅលើវត្ថុស័ក្ដិសិទ្ធិដែលប្រជាពលរដ្ឋខ្មែរទូទាំង ប្រទេសដែលគេមានជំនឿរាប់ពាន់ឆ្នាំ មកហើយ ។
លោក វណ្ណ ប៊ុនណា ប្រធានមន្ទីរ ធម្មការ និងសាសនាខេត្ដសៀមរាបបាន មានប្រសាសន៍នៅ ថ្ងៃទី២២ ខែមករា ឆ្នាំ២០១៦ថា ចំពោះស្ដ្រីដែលចូលមក តាំងខ្លួនជាអ្នកស្នងរូបលោកយាយទេព នោះគឺគាត់បានមកចូលរូបនៅមុខ សំណាក់លោកយាយគឺនៅចន្លោះពីម៉ោង១០ទៅម៉ោង១១យប់ថ្ងៃទី១៩ ខែមករា ព្រោះសមត្ថកិច្ចនិងអ្នកយាមនៅកន្លែង លោកយាយនោះពួកគាត់បាននាំគ្នាទៅ ផ្ទះអស់ហើយ ។
សូមរំលឹកថា កាលពីពេលថ្មីៗនេះ លោក ឃឹម ប៊ុនសុង អភិបាលនៃគណៈអភិ បាលខេត្ដសៀមរាបបានមានប្រសាសន៍ប្រាប់អ្នកយកព័ត៌មានថា លោកនឹងឱ្យ សមត្ថកិច្ចចាំឃ្លាំមើលបើឃើញស្ដ្រីនោះ ឬនរណាក៏ដោយឱ្យតែមកតាំងខ្លួននៅ មុខព្រះភ័ក្ដ្ររូបលោកយាយទេពទៀត លោកនឹងឱ្យសមត្ថកិច្ចនោះចាត់ការ តាមផ្លូវច្បាប់ ៕
ដោយ៖ ប៊ុន រិទ្ធី
