ខេត្ដបាត់ដំបង៖ មិនមែនតែនៅ ភ្នំពេញដែលមានការអភិវឌ្ឍខ្លាំងនោះ ទេ ដែលមានរណ្ដៅដីជ្រៅបន្សល់ទុកនៅ ខេត្ដបាត់ដំបងក៏មានរណ្ដៅដីជ្រៅៗដែរ ។
ប្រជាពលរដ្ឋរស់នៅក្នុងក្រុងបាត់ដំបង មានការភ័យខ្លាចចំពោះសុវត្ថិភាពកូន ចៅក៏ដូចជាសត្វពាហនៈនៅពេលក្រុមឈ្មួញជាច្រើនធ្វើសកម្មភាពកាយយក អាចម៍ដីយ៉ាងគគ្រឹកគគ្រេងបន្សល់នូវ ជម្រៅដីធំៗគួរឱ្យព្រួយបារម្ភ ។
បើតាមប្រជាពលរដ្ឋថា រណ្ដៅដីដ៏ គួរឱ្យភ័យខ្លាចនោះ ស្ថិតនៅភូមិច្រាប ក្រសាំង ក៏ដូចជាអន្លង់វិល ដែលមាន រហូតទៅដល់៤-៥កន្លែង និងមានជម្រៅ ចាប់ពី៧ម៉ែត្ររហូតទៅដល់ជាង១០ ម៉ែត្រឯណោះ ។ រណ្ដៅដ៏ជ្រៅៗនេះបាន ធ្វើឱ្យពួកគាត់ភ័យព្រួយយ៉ាងខ្លាំងនៅ ពេលដល់រដូវភ្លៀងដែលអាចធ្វើឱ្យ មនុស្សលង់ក៏ដូចជាសត្វពាហនៈចូលទៅកាន់ទីនោះដោយមិនដឹងខ្លួន ក៏ដូចជាការ បាក់ដីផ្ទះរបស់ពួកគាត់ផងដែរ ។
បើតាមម្ចាស់គ្រឿងចក្រនិងក្រុមឈ្មួញ ដែលធ្វើសកម្មភាពជីកកកាយដីជារណ្ដៅនេះបានថ្លែងថា រណ្ដៅដីដែលពួកគេ ជីកនេះគឺបានទិញដីគេ ហើយបើមិនជីក ឱ្យជ្រៅធ្វើម៉េចនឹងចំណេញ ។ ម្យ៉ាងទៀត ការជីកនេះគឺពួកគេបានសុំច្បាប់ត្រឹម ត្រូវដោយបានបង់លុយឱ្យទៅមន្ទីរក្នុង មួយម៉ែត្រគូបចំនួនបួនកាក់ដុល្លារ ។
ពាក់ព័ន្ធនឹងករណីនេះ នគរវត្ដមិន អាចទាក់ទងសុំការបំភ្លឺពីលោក អ៊ាន មាឃ ប្រធានមន្ទីររ៉ែនិងថាមពលខេត្ដ បាត់ដំបងបានទេ ដោយសារទូរស័ព្ទចូល ជាច្រើនដងតែមិនមានអ្នកទទួល ។
ការដែលលោកប្រធានមន្ទីរមិន ទទួលទូរស័ព្ទរបស់អ្នកសារព័ត៌មាន បើ តាមលោក អេង ដែលជាឈ្មួញកាយ ដីធំជាងគេក្នុងក្រុងបាត់ដំបង និងស្និទ្ធ ជាមួយលោកប្រធានមន្ទីរនោះថា លោក ប្រធានគាត់មិនទទួលទូរស័ព្ទអ្នកកាសែតទេ ព្រោះគ្មានបានប្រយោជន៍អី ដោយអ្នក កាសែតបានតែបង្ហោះនិងបានតែផ្សាយញុះញង់ ៕
ដោយ៖ ហេង និរន្ទ្រ
