បណ្តាប្រទេសតំបន់អឺរ៉ុបបានបើកព្រំដែនដើម្បីដំណើរការវិស័យទេសចរណ៍ ជួយដល់សេដ្ឋកិច្ច បណ្តាប្រទេសក្នុងតំបន់ឱ្យបានល្អប្រសើរឡើងវិញ។ ប៉ុន្តែប្រទេស ក្រៅពីតំបន់អឺរ៉ុបមិនទាន់អនុញ្ញាតឲ្យចូលទៅកាន់អឺរ៉ុបនៅឡើយទេ។
តាមសារព័ត៌មាន AP បានផ្សាយថា អឺរ៉ុប បានខិតខំដើម្បីធ្វើឲ្យជីវិតរស់នៅរបស់ពលរដ្ឋវិលត្រឡប់មកសភាពដើមវិញ ក្រោយរយៈពេល៣ខែបិទព្រំដែនដោយសារតែកូវីដ-១៩។ ការបើកព្រំដែនចំពេលអឺរ៉ុបឈានចូលរដូវក្តៅ ជាពេលវេលាដែលវិស័យទេសចរណ៍មមាញឹកបំផុតនៅអឺរ៉ុប។
ចំណែកអ្នកទេសចរមកពីតំបន់អាមេរិក អាមេរិកឡាទីន អាស៊ី ត្រូវរង់ចាំមួយរយៈទៀតទើបអាចអនុញ្ញាតឲ្យចូលអឺរ៉ុប។ តាមគម្រោងអឺរ៉ុប នឹងទទួលស្វាគមន៍អ្នកទេសចរបរទេសនៅខែក្រោយ តែមិនទាន់ដឹងពេលវេលាច្បាស់លាស់នៅឡើយទេដោយរង់ចាំមើលលទ្ធផលនៃការបើកព្រំដែនតើមានអ្វីប្រែប្រួល ។
ប្រធានគណៈកម្មការផ្ទៃក្នុងអឺរ៉ុប លោកស្រីYlva Johansson បាននិយាយទៅកាន់បណ្តាប្រទេសជាសមាជិកថា ការបើកព្រំដែននៅថ្ងៃទី១៥ ខែមិថុនានេះជាពេលវេលាដ៏ល្អបំផុត។
បើទោះបីបើកព្រំដែនក្តី ប៉ុន្តែពលរដ្ឋជាច្រើនសម្រេចបន្តនៅក្នុងផ្ទះ មិនទាន់ហ៊ានធ្វើដំណើរកម្សាន្តច្រើននោះឡើយ គឹគេមើលឃើញមានតែគូស្នេហ៍ក្មេងៗប៉ុណ្ណោះដែលបានដើរកម្សាន្តសប្បាយ ដោយសារតែក្មេងៗប្រឈមនិឹងគ្រោះថ្នាក់តិច ជាងចាស់ៗ៕
