ភ្នំពេញ៖ លោក ឌី រ័ត្នខេមរុណ អភិបាលរងខណ្ឌមានជ័យ កាលពីវេលាម៉ោង៦ និង១៥នាទីព្រឹកថ្ងៃទី១៥ ខែមិថុនា ឆ្នាំ ២០២០ បានចុះសម្របសម្រួលជាមួយប្រជាពលរដ្ឋមកតវ៉ាដីធ្លី ដែលបាននាំគ្នាមកពីខេត្តព្រះវិហារ ក្នុងករណីជម្លោះជាមួយក្រុមហ៊ុន មេត្រីភាព ដែលកំពុងស្នាក់នៅវត្តចង្រ្កានតាព្រហ្មស្ទឹងមានជ័យ ស្ថិតនៅក្រុមទី១ ភូមិមានជ័យ១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ។
លោកអភិបាលរងខណ្ឌ បានឲ្យដឹងថា ក្នុងនោះដែរមានប្រជាពលរដ្ឋចំនួនប្រហែល ៥០នាក់តំណាងឲ្យ ៦០០គ្រួសារ មកពី ភូមិថ្មី ភូមិរស្មី ភូមិអន្ទិល ឃុំយាង ស្រុកជាំក្សាន្ត ខេត្តព្រះវិហារ មានបញ្ហាដីធ្លីជាមួយក្រុមហ៊ុន (មេត្រីភាព) ផ្ទៃដីសរុប ៣០២៥ ហិកតា បានមកឈប់ សម្រាកចាំគ្នានៅក្នុងវត្តស្ទឹងមានជ័យ ។ ដោយប្រើប្រាស់មធ្យោបាយធ្វើដំណើរ៖រថយន្តតូរីសចំនួន ០២គ្រឿង។ គោលបំណង ទៅដាក់ញត្តិនៅខុទ្ទកាល័យសម្ដេច និង ក្រសួងដែនដីដើម្បីជួយអន្តរាគមន៍ជូនពួកគាត់ ។
ចុងក្រោយលោក ឌី រ័ត្នខេមរុណ ក្នុងការសម្របសម្រួលជូនបងប្អូនប្រជាពលរដ្ឋដែលមកពីព្រះវិហារ មានចំនួន ៥០នាក់ តំណាងឲ្យ៦០០គ្រួសារនោះ ក៏ទទួលបានម៉ាស់សម្រាប់ការពារ និងទប់ស្កាត់ជំងឺឆ្លងកូវីដ –១៩ ម្នាក់មួយផងដែរ ៕ដោយ៖ស តារា
