លោកស្រីអ៊ុង សានស៊ូជី បានជួបពិភាក្សាជាមួយមេបញ្ជាការយោធាមីយ៉ាន់ម៉ា លោក Min Aung Hlaing នៅមុនពេលដែលសភារដ្ឋាភិបាលថ្មីចាប់ផ្តើមដំណើរការថ្ងៃដំបូងរបស់ខ្លួននៅសប្តាហ៍ខាងមុខនេះ ។ លោក Min Aung Hlaing ដែលជាមេបញ្ជាការយោធាដ៏មានអំណាចបំផុតនៅមីយ៉ាន់ម៉ានោះត្រូវតែប្រគល់អំណាចទៅឲ្យលោកស្រីអ៊ុង សានស៊ូជី ដែលជាប្រធានគណបកស្សសម្ពន្ធជាតិដើម្បីលទ្ធិប្រជាធិបតេយ្យ បន្ទាប់ពីទទួលជ័យជម្នះយ៉ាងភ្លូកទឹកភ្លូកដីក្នុងការបោះឆ្នោតប្រកបដោយលទ្ធិប្រជាធិបតេយ្យកាលពីថ្មីៗកន្លងទៅនេះ ។
នេះជាជំនួបលើកទី២ហើយរវាងលោកស្រី អ៊ុង សានស៊ូជី នឹងលោក Min Aung Hlaing ដែលជាមេបញ្ជាការយោធានោះ នៅក្រោយពីគណបក្សរបស់លោកស្រីស៊ូជី បានទទួលជ័យជម្នះជិត៨០ភាគរយនៃកៅអីសរុបក្នុងរដ្ឋសភា ក្នុងការបោះឆ្នោតកាលពីខែវិច្ឆិកា ឆ្នាំ២០១៥កន្លងមកនោះ ។ នេះជាជ័យជម្នះមួយដែលត្រួតត្រាយផ្លូវឲ្យមីយ៉ាន់ម៉ាមានរដ្ឋាភិបាលមួយដឹកនាំតាមបែបលទ្ធិប្រជាធិបតេយ្យលើកដំបូងគេបំផុត ដែលមិនធ្លាប់មានក្នុងទស្សវត្សរ៍នោះ ។
អ្នកជំនាញបញ្ហានយោបាយនៅមីយ៉ាន់ម៉ាបានបញ្ជាក់ថា ស្ថាប័នយោធាជាស្ថាប័នមួយដាច់ដោយឡែក ហើយមានឥទ្ធិពលជាងគេបំផុត ។ ហេតុដូច្នេះហើយ នៅពេលដែលនរណាម្នាក់មានឱកាសឡើងកាន់តំណែងនៅមីយ៉ាន់ម៉ានោះចាំបាច់ខានមិនបានគឺត្រូវតែធ្វើកិច្ចសហប្រតិបត្តិការជាមួយកម្លាំងយោធា ។
រដ្ឋធម្មនុញ្ញតាក់តែងឡើងដោយរដ្ឋាភិបាលយោធាមីយ៉ាន់ម៉ាកាលពីឆ្នាំ២០០៨នោះបានបញ្ជាក់ថា កងកម្លាំងប្រដាប់អាវុធត្រូវតែមានកៅអីនៅក្នុងរដ្ឋសភាយ៉ាងតិច១ភាគ៤នៃកៅអីសរុប ។ ស្ថាប័នយោធាមានរដ្ឋមន្ត្រី៣រូបស្ថិតនៅក្នុងរដ្ឋសភាមានសិទ្ធិវេតូ ដោយមិនអាចប្រឆាំងបាន ។
នៅលើប្រព័ន្ធទំនាក់ទំនងសង្គមហ្វេសប៊ុករបស់មេបញ្ជាការយោធាមីយ៉ាន់ម៉ា លោក Min Aung Hlaing បានបញ្ជាក់កាលពីព្រឹកថ្ងៃទី២៦ ខែមករា ឆ្នាំ២០១៦ នៅក្រោយពីជំនួបជាមួយលោកស្រីអ៊ុង សានស៊ូជី កាលពីថ្ងៃទី២៥ ខែមករា នោះថា «ភាគីទាំងពីរបានផ្លាស់ប្តូរទស្សនៈគ្នាទៅវិញទៅមក ស្តីអំពីអន្តរជាតិនៃសន្តិភាព និងស្ថេរីភាពនៅមុនពេល និងអំឡុងពេលបោះឆ្នោត, បញ្ហាទាក់ទងកិច្ចការរដ្ឋសភា និងព័ត៌មានស្តីអំពីរដ្ឋាភិបាលថ្មី» ។
ជំនួបនោះធ្វើឡើងក្នុងរយៈពេល២ម៉ោងរវាងថ្នាក់ដឹកនាំគណបក្សឈ្នះឆ្នោត និងមន្ត្រីជាន់ខ្ពស់របស់កងកម្លាំងយោធាមីយ៉ាន់ម៉ា ។
រដ្ឋធម្មនុញ្ញមីយ៉ាន់ម៉ាបានរាំងខ្ទាស់លោកស្រីអ៊ុង សានស៊ូជី មិនឲ្យធ្វើជាប្រធានាធិបតីមីយ៉ាន់ម៉ាបានឡើយ ពីព្រោះលោកស្រីជាកូនកាត់អង់គ្លេស ។ ប៉ុន្តែទោះបីយ៉ាងណា គណបក្សសម្ពន្ធជាតិដើម្បីលទ្ធិប្រជាធិបតេយ្យបានប្តេជ្ញាថា នឹងតែងតាំងប្រធានាធិបតីតាមនីតិវិធី ហើយគណបក្សនេះនឹងដឹកនាំប្រទេសជាតិតរៀងទៅ ។
លោកស្រីស៊ូជី បានធ្វើឲ្យពិភពលោកចាប់អារម្មណ៍យ៉ាងខ្លាំង ចាប់តាំងពីលោកស្រីទទួលបានសំឡេងគាំទ្រឈ្នះទៅលើគូសត្រូវរបស់លោកស្រី ក្នុងនោះបានធ្វើឲ្យលោក Than Shwe អតីតមេដឹកនាំរដ្ឋាភិបាលយោធា ដែលកាន់អំណាចនៅមីយ៉ាន់ម៉ាអស់រយៈពេល៤៩ឆ្នាំបើកឱកាសឲ្យមានរដ្ឋាភិបាលពាក់កណ្តាលស៊ីវិលក្នុងឆ្នាំ២០១១រៀងរហូតមកដល់បច្ចុប្បន្ន ៕
ប្រែសម្រួល៖ ថាច់ យ៉ាត
