ខេត្តមណ្ឌលគិរី៖ ស្នងការដ្ឋាននគរបាលខេត្តមណ្ឌលគិរី កាលពីព្រឹកថ្ងៃទី២៥ មករា ឆ្នាំ២០១៦ បានបើកវគ្គបណ្ដុះបណ្ដាលនិតិវិធីក្រមសីលធម៌របស់មន្ដ្រីនគរបាល ចរាចរណ៍ផ្លូវគោកក្រោមវត្តមានលោក ឡុង ធូ អនុប្រធាននាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ នៃអគ្គស្នងការនគរបាលជាតិ និងសិក្ខាកាមចូលរួមចំនួន៣៣នាក់។
ក្នុងវគ្គបណ្ដុះបណ្ដាលនាពេលនោះ ឧត្តមសេនីយ៍ត្រី តូច យ៉ុន ស្នងការនគរបាលខេត្តមណ្ឌលគិរី បានមានប្រសាសន៍ថា ក្នុងរយៈពេលជិត៣សប្ដាហ៍មកនេះ ក្រុមមន្ដ្រីនគរបាលចរាចរណ៍បានចុះអនុវត្តន៍ច្បាប់ចរាចរណ៍ផ្លូវគោក និងឃាត់យានយន្ដដែលប្រព្រឹត្តខុសច្បាប់បានជាច្រើនករណី។ លោកបន្ដថា ចំពោះបញ្ហាលើដងផ្លូវវិញគឺមានច្រើន នៅក្នុងនោះមានបញ្ហាការប្រកាន់ឥរិយាបទការបើកបរខ្វះស្មារតី មិនគោរពយោគយល់អធ្យាស្រ័យគ្នា នៅតាមដងផ្លូវខ្វះឧបករណ៍តាមដាន និងសុវត្ថិភាពគ្រប់គ្រាន់ រថយន្ដមូយចំនួនមិនមានលក្ខណៈសមស្របទៅតាមបច្ចេកទេសត្រឹមត្រូវ។
ស្របពេលនោះឧត្តមសេនីយ៍ត្រី តូច យ៉ុន បានមានប្រសាសន៍បន្ដថា ដើម្បីឲ្យមានការអនុវត្តន៍ច្បាប់ចរាចរណ៍ផ្លូវគោកថ្មីឲ្យមានប្រសិ ទ្ឋភាព គុណភាពខ្ពស់ លោកសុំសំណូមពរដល់មន្ដ្រីជំនាញទាំងអស់ឲ្យគោរព និងអនុវត្តន៍តាមបទបញ្ជារបស់ថ្នាក់លើ។ ក្រោយមានការធ្វើបទបង្ហាញស្ដីពី និតិវិធីប្រតិបត្តិការក្រមសីលធម៏របស់មន្ដ្រីនគរបាលចរាចរណ៍ ផ្លូវគោកមក ក៍មានការចុះអនុវត្តន៍ផ្ទាល់ពីច្បាប់និតិប្រតិបត្តិការតាមដងផ្លូវ ស្ថិតនៅត្រង់រង្វង់មូលគោព្រៃ និងមន្ដ្រីនគរបាលបានធ្វើការណែនាំដល់បងប្អូនប្រជាពលរដ្ឋដែលនៅ មិនទាន់យល់ច្បាស់ពីច្បាប់ចរាចរណ៍ថ្មីនេះ៕
ដោយ៖ ហេង នរិន្ទ្រ
