ក្រុមតោខៀវ Chelsea និងក្រុមចចកកំណាច Leicester City បាត់បង់ឱកាសរកបាន៣ពិន្ទុ ដោយសារតែចាញ់ក្រោមថ្វីជើងក្រុមម្ចាស់ផ្ទះ West Ham United និង Everton ក្នុងការប្រកួតកាលពីរាត្រីថ្ងៃទី១ ខែកក្កដា។ ចំណែកក្រុមកាំភ្លើងធំ Arsenal កំពុងឡើងជើងដោយបានបំបាក់ក្រុមភ្ញៀវ Norwich City ក្នុងលទ្ធផល ៤ទល់០។ នេះបើយោងតាមការចេញផ្សាយរបស់ BBC Sport នៅព្រឹកថ្ងៃព្រហស្បតិ៍នេះ។
ក្រុមតោខៀវ Chelsea កំពុងតែជិតបាត់បង់ឱកាសឈរចំណាត់ថ្នាក់លេខ៤ដោយសារតែចាញ់កាលពីយប់មិញ ព្រោះក្រុមលេខ៥បិសាចក្រហមចាញ់តែ២ពិន្ទុប៉ុណ្ណោះ។ ក្រុម West Ham United ធ្វើបានល្អ ដោយយកឈ្នះក្រុមខ្លាំងតោខៀវ ដោយលទ្ធផល ៣ទល់២ យ៉ាងប្រផិតប្រផើយនៅចុងម៉ោង។ ៣គ្រាប់របស់ក្រុមម្ចាស់ផ្ទះ West Ham United រកបានដោយកីឡាករ Souček នៅនាទីទី៤៥មុនចប់ការប្រកួតទង់ទី១, គ្រាប់ទី២រកបានដោយកីឡាករ Antonio នៅនាទីទី៥១ និងគ្រាប់ទី៣រកបានដោយកីឡាករYarmolenko នៅនាទីទី៨៩ ជិតចប់ការប្រកួតទៅហើយ។ ចំណែកក្រុមភ្ញៀវតោខៀវរកបាន២គ្រាប់ដោយកីឡាករWillian បានបាល់ប៉េណាល់ទីនៅនាទីទី៤២ និង១គ្រាប់ទៀតរកបាននៅនាទីទី៧២ដោយកីឡាករដដែលនេះ។ លទ្ធផលនេះធ្វើឲ្យក្រុមតោខៀវបន្តឈរចំណាត់ថ្នាក់លេខ៤ មាន៥៤ពិន្ទុ ខណៈក្រុមWest Ham United ឈរចំណាត់លេខ១៦ ។
មួយគូទៀតគឺក្រុមម្ចាស់ផ្ទះ Everton បានយកឈ្នះក្រុម Leicester City ក្នុងលទ្ធផល២ទល់១ ដែលធ្វើឲ្យក្រុម Leicester City កំពុងតែប្រឈមនឹងការបាត់បង់ឱកាសចំណាត់ថ្នាក់លេខ៣។ ២គ្រាប់រប់សក្រុមម្ចាស់ផ្ទះ Everton រកបានដោយកីឡាករ Richarlison នៅនាទីទី១០ និង១គ្រាប់ទៀតរកបានដោយកីឡាករ Sigurðsson នៅនាទីទី១៦ ដោយបាល់ពិន័យប៉េណាល់ទី។ ចំណែកក្រុមភ្ញៀវក៏រកបាន១គ្រាប់សងវិញនៅនាទីទី៥១ ដោយកីឡាករ Iheanacho ។ លទ្ធផលនេះធ្វើឲ្យក្រុម Everton ឡើងទៅឈរចំណាត់ថ្នាក់លេខ១១ មាន៤៤ពិន្ទុ ខណៈក្រុម Leicester City នៅបន្តឈរចំណាត់ថ្នាក់លេខ២ មាន៥៥ពិន្ទុដដែល ។
ដោយឡែកក្រុមម្ចាស់ផ្ទះកាំភ្លើធំ Arsenal បានបំបាក់ក្រុមភ្ញៀវ Norwich City ដោយលទ្ធផល ៤ទល់០ ក្នុងការប្រកួតសម្រាប់សប្តាហ៍ទី៣២នៃលីកកំពូលអង់គ្លេស។ ៤គ្រាប់របស់ក្រុមម្ចាស់ផ្ទះរកបានដោយកីឡាករ Aubameyang ២គ្រាប់ម្នាក់ឯងគឺនៅនាទីទី៣៣ និងនាទីទី៦៧ ហើយ២គ្រាប់ទៀតរកបានដោយកីឡាករ Xhaka នៅនាទីទី៣៧ និងកីឡាករ Cédric Soares នៅនាទីទី៨១។ លទ្ធផលនេះធ្វើឲ្យក្រុមកាំភ្លើងធំ Arsenal ឡើងទៅឈរចំណាត់ថ្នាក់លេខ៧ មាន៤៦ពិន្ទុ ខណៈដែលក្រុម Norwich City នៅបន្តឈរបាតតារាងលេខ២០ មានតែ២១ពិន្ទុប៉ុណ្ណោះ។
សូមបញ្ជាក់ថា នៅរាត្រីថ្ងៃព្រហស្បតិ៍នេះកម្មវិធីប្រកួតលីកកំពូលអង់គ្លេសមាន២គូទៀតគឺក្រុមម្ចាស់ផ្ទះ Sheffield United ប៉ះក្រុមភ្ញៀវ Tottenham Hotspur វេលាម៉ោង១២អធ្រាត្រ និងក្រុមម្ចាស់ផ្ទះមេឃខៀវ Man City ប៉ះក្រុមខ្លាំងហង្សក្រហម Liverpool វេលាម៉ោង២និង១៥នាទីរំលងអធ្រាត្រឈានចូលថ្ងៃទី៣ កក្កដា ម៉ោងនៅកម្ពុជា។ ក្រៅពីការប្រកួតលីកកំពូលអង់គ្លេសក៏មានការប្រកួតលីកកំពូលអេស្ប៉ាញដែរ ដោយក្រុមEibar ប៉ះក្រុម Osasuna ម៉ោង១២កន្លះយប់, ក្រុម Real Sociedad ប៉ះក្រុម Espanyol ម៉ោង១២កន្លះយប់ដែរ និងក្រុម Real Madrid ប៉ះ Getafe ម៉ោង៣រំលងអធ្រាត្រ។ ចំណែកលីកកំពូលអ៊ីតាលីក៏មាន២ប្រកួតដែរដែលជាការជួបគ្នារវាងក្រុម Atalanta ប៉ះក្រុម Napoli ម៉ោង១២កន្លះយប់ និងក្រុម Roma ប៉ះក្រុម Udinese ម៉ោង២និង៤៥នាទីរំលងអធ្រាត្រ ៕
ដោយ៖ ភារៈ
