ខេត្តក្រចេះ៖ នៅថ្ងៃទី២ ខែកក្កដា ឆ្នាំ២០២០ វេលាម៉ោង១៥:០៥នាទី កម្លាំងជំនាញប្រឆាំងគ្រឿងញៀននៃអធិការដ្ឋាននគរបាលស្រុកស្នួល សហការជាមួយកម្លាំងប៉ុស្ដិ៍នគរបាលរដ្ឋបាលគ្រញូងសែនជ័យ បានធ្វើការបង្ក្រាបករណីជួញដូរនូវសារធាតុញៀន នៅចំណុចចម្ការកៅស៊ូគីឡូម៉ែត្រ១១៣ ភូមិគ្រញូងសែនជ័យជើង ឃុំគ្រញូងសែនជ័យ ស្រុកស្នួល ខេត្តក្រចេះ ដោយឃាត់ខ្លួនជនសង្ស័យ១នាក់ឈ្មោះ សែម វុត្ថា ភេទប្រុស អាយុ៣៧ឆ្នាំ ជនជាតិខ្មែរ រស់នៅភូមិក្បាលស្នួល ឃុំស្នួល ស្រុកស្នួល ខេត្តក្រចេះ ។
ក្រោយឃាត់ខ្លួនសមត្ថកិច្ចចាប់យកវត្ថុតាងពីជនសង្ស័យរួមមាន ម្សៅក្រាមពណ៌សថ្លាសង្ស័យជាគ្រឿងញៀនប្រភេទមេតំហ្វេតាមីន(ម៉ាទឹកកក)ចំនួន៣កញ្ចប់(១កញ្ចប់ធំ, ១កញ្ចប់មធ្យម និង១កញ្ចប់តូច), ជញ្ជីងអេឡិចត្រូនិកចំនួន១, ថង់សម្រាប់ច្រកគ្រឿងញៀនមួយចំនួនតូច, បំពង់កែវកែច្នៃសម្រាប់ជក់គ្រឿងញៀនចំនួន១ ដាក់លាក់ក្នុងកំប៉ុងដែកមានគម្របពណ៌ទឹកប្រាក់លាយផ្ទៃមេឃ នឹងម៉ូតូម៉ាកវ៉េវគ្មានស្លាកលេខ ពណ៌ក្រហមលាយផ្កាឈូកចំនួន១គ្រឿង ។
បច្ចុប្បន្នជនសង្ស័យខាងលើរួមជាមួយសម្ភារវត្ថុតាងត្រូវបានឃាត់ខ្លួន និងរក្សាទុកបណ្តោះអាសន្ននៅអធិការដ្ឋាននគរបាលស្រុកស្នួល ដើម្បីកសាងសំណុំរឿង៕ស សម
