អន្តរជាតិ៖ ក្នុងសេចក្តីថ្លែងការណ៍ ទីភ្នាក់ងារទទួលបន្ទុកកិច្ចការអន្តោប្រវេសន៍និងគយ (ICE) របស់អាមេរិក នៅថ្ងៃទី៦ ខែកក្កដា បានបញ្ជាក់ថា និស្សិតដែលកំពុងសិក្សានៅសហរដ្ឋអាមេរិកតាមរយៈប្រព័ន្ធអនឡាញ ត្រូវចាកចេញពីប្រទេសខ្លួន ឬអនុវត្តវិធានការដទៃទៀត ដូចជា៖ការផ្ទេរទៅកាន់សាលារៀនដែលមានគ្រូបង្គោលណែនាំដោយផ្ទាល់ ជាដើម។ មិនតែប៉ុណ្ណោះ សហរដ្ឋអាមេរិក បានប្រកាសថា ខ្លួននឹងមិនអនុញ្ញាតឲ្យនិស្សិតបរទេសបន្តរស់នៅ និងសិក្សាក្នុងប្រទេសទៀតឡើយ ប្រសិនបើថ្នាក់ពួកគេទាំងអស់ត្រូវប្ដូរទៅរៀនតាមអនឡាញនៅឆមាសក្រោយ ដោយសារវិបត្តិ COVID-19 ។
តាមទីភ្នាក់ងារសហព័ទ្ធអាមេរិកនេះ បានសង្កត់ធ្ងន់ ដែលដកស្រង់ចុះផ្សាយដោយទីភ្នាក់ងារព័ត៌មាន AFP ថា៖ ប្រសិនមិនធ្វើដូច្នេះទេ ពួកគេអាចប្រឈមមុខពិន័យផ្នែកអន្តោប្រវេសន៍ រួមមាន ការផ្ដួចផ្ដើមនីតិវិធីដកឈ្មោះពួកគេចេញពីបញ្ជីអន្តោប្រវេសន៍អាមេរិក។
ទីភ្នាក់ងារ ICE អាមេរិកនេះ បានអះអាងទៀតថា ក្រសួងការបរទេសអាមេរិក នឹងមិនចេញទិដ្ឋាការដល់សិស្សចុះឈ្មោះចូលរៀនក្នុងថ្នាក់ដែលដំណើរការតាមប្រព័ន្ធអនឡាញទាំងស្រុង សម្រាប់ឆមាសនារដូវស្លឹកឈើជ្រុះ (សប្ដាហ៍ទី៣នៃខែកញ្ញា ដល់ចុងខែធ្នូ) ខាងមុខ។ហើយទីភ្នាក់ងារទទួលបន្ទុកការពារព្រំដែននិងគយអាមេរិក (UBP) ក៏នឹងមិនអនុញ្ញាតឲ្យសិស្សទាំងនោះចូលទឹកដីអាមេរិកផងដែរ។ ដោយការសម្រេចចិត្តរបស់សហរដ្ឋអាមេរិកបែបនេះ នឹងប៉ះពាល់ដល់សិស្សរាប់ពាន់នាក់ដែលទៅកាន់សហរដ្ឋអាមេរិកដើម្បីបន្តការសិក្សានៅថ្នាក់ឧត្តមសិក្សា ឬចូលរួមកម្មវិធីហ្វឹកហាត់ ក៏ដូចជាការសិក្សាខាងវិជ្ជាជីវៈជាដើម។
គួរបញ្ជាក់ថា និស្សិតម្នាក់ អាយុ២៦ឆ្នាំ ឈ្មោះ Valeria Mendiola បានប្រាប់ទូរទស្សន៍អាមេរិក CNNថា៖«វាកើតមានភាពមិនច្បាស់លាស់ច្រើនណាស់។ វាធ្វើឲ្យខ្ញុំពិបាកនឹងធ្វើការសម្រេចចិត្ត»។ និស្សិតនៅសាកលវិទ្យាល័យ Harvard រូបនេះបន្តទៀតថា៖«ប្រសិនខ្ញុំត្រូវត្រលប់ទៅកាន់ប្រទេសម៊ិកស៊ិកវិញ ខ្ញុំអាចត្រលប់ទៅវិញបាន ក៏ប៉ុន្តែនិស្សិតបរទេសច្រើនទៀត ពុំអាចធ្វើអ៊ីចឹងបានឡើយ»។
សូមជម្រាបថា សាកលវិទ្យាល័យភាគច្រើននៅសហរដ្ឋអាមេរិក ពុំទាន់ប្រកាសផែនការពួកគេសម្រាប់ឆមាសនារដូវស្លឹកឈើជ្រុះឆ្នាំ២០២០នៅឡើយទេ។ សាលារៀនមួយចំនួន កំពុងពិចារណាយកមធ្យោបាយបង្រៀនលាយគ្នា រវាងអនឡាញ និងក្នុងថ្នាក់ ក៏ប៉ុន្តែសាកលវិទ្យាល័យខ្លះ ក្នុងនោះ សាកលវិទ្យាល័យ Harvard បានអះអាងថា ថ្នាក់ពួកគេទាំងអស់ នឹងត្រូវរៀបចំឡើងតាមប្រព័ន្ធអនឡាញ ។ ត្រង់ចំណុចនេះហើយ សាកលវិទ្យាល័យ Harvard បញ្ជាក់ថា ៤០ភាគរយនៃនិស្សិតថ្នាក់បរិញ្ញាប័ត្រពួកគេ នឹងត្រូវអនុញ្ញាតឲ្យត្រលប់ទៅកាន់បរិវេណសាលារៀនវិញ តែការបង្រៀន នឹងត្រូវរៀបចំឡើងតាមអនឡាញ។
ដោយឡែកយោងតាមរបាយការណ៍របស់វិទ្យាស្ថានអប់រំអន្តរជាតិ (IIE) ក្នុងឆ្នាំសិក្សា២០១៨–២០១៩ មាននិស្សិតបរទេសជាង១លាននាក់សិក្សាក្នុងសហរដ្ឋអាមេរិក។ តួលេខនេះ ស្មើនឹង៥,៥ភាគរយនៃសិស្សថ្នាក់ឧត្តមសិក្សាសរុបរបស់សហរដ្ឋអាមេរិក ហើយនិស្សិតបរទសរួមចំណែក ៤៤,៧ពាន់លានដុល្លារដល់សេដ្ឋកិច្ចអាមេរិកកាលពីឆ្នាំ២០១៨។ សិស្សបរទេសច្រើនបំផុតដែលសិក្សានៅអាមេរិកគឺមកពី ចិនឥណ្ឌា កូរ៉េខាងត្បូង អារ៉ាប៊ីសាអូឌីត និងកាណាដា៕ដោយ៖ស តារា
