ថៃបានផ្លាស់ប្តូរច្បាប់កំណត់ សម្រាប់ជនបរទេសចូលមកប្រទេសរបស់ខ្លួនក្រោយពីមានករណីឆ្លងកូវីដ-១៩ចំនួន២នាក់ថ្មី។ សារព័ត៌មាន AP បានផ្សាយថា នៅថ្ងៃទី១៤ខែកក្កដា រដ្ឋាភិបាលថៃ បានសម្រេចថា ករណីចូលប្រទេសថៃដោយមូលហេតុកិច្ចការបរទេស គឺត្រូវនៅដាច់ដោយឡែក១៤ថ្ងៃ ក្រោមការតាមដានយ៉ាងយកចិត្តទុកដាក់។
រដ្ឋាភិបាលថៃ លើកលែងការដាក់ឲ្យនៅដាច់ដោយឡែកចំពោះបុគ្គល៣ប្រភេទដែលចូលមកប្រទេសថៃ ក្នុងនោះមានភ្ញៀវដែលរដ្ឋាភិបាលថៃ អញ្ជើញចូលរួមក្នុងពិធីផ្សេងៗ ដែលមានមន្ត្រីការបរទេស ឬតំណាង អង្គការអន្តរជាតិ។ អ្នកជំនួញ អ្នកវិនិយោគ និងអ្នកដែលចូលមកបំពេញភារកិច្ចចាំបាច់ដែលរដ្ឋាភិបាលថៃអនុញ្ញាត។
សកម្មភាពខាងលើកើតឡើងក្រោយពេលថៃរកឃើញករណីឆ្លងថ្មីពីរនាក់ ដោយមានប្រវត្តិធ្វើដំណើរយ៉ាងស្មុគស្មាញនៅក្នុងសហគមន៍ ពិបាកនៅក្នុងការគ្រប់គ្រងថាតើអ្នកទាំងពីរបានជួបខាងណាខ្លះនោះឡើយ។
ករណីទីមួយ គឺជាយោធាជនជាតិអេហ្ស៊ីបបានចូលដល់ទឹកដីថៃនៅថ្ងៃទី ៨ខែកក្កដា ហើយបានយកកំហាកទៅធ្វើតេស្តនៅថ្ងៃទី១០ខែកក្កដា ក្នុងខេត្ត Rayong នៅថ្ងៃទី១២ ខែកក្កដាឃើញមានលទ្ធផលវិជ្ជមានចំពោះកូវីដ-១៩។ បុគ្គលខាងលើបានចេញពីសណ្ឋាគារធ្វើដំណើរទៅផ្សារ និងទីតាំងផ្សេងៗជាច្រើនទៀត។
ករណីទីពីរ គឺកុមារីអាយុ៩ឆ្នាំ ជាសមាជិកក្នុងគ្រួសារមន្ត្រីការបរទេស មកពីស៊ូដង់ ហើយចូលមកក្នុងប្រទេសថៃ ដោយមិនបង្ខំឲ្យនៅដាច់ដោយឡែកឡើយ គឺត្រូវនៅដាច់ដោយឡែកកន្លែងខ្លួនស្នាក់នៅ ក្នុងទីក្រុងបាងកក។ នៅថ្ងៃទី១១ខែកក្កដា ក៏បានរកឃើញវិជ្ជមានកូវីដ-១៩ដែរ។
រយៈពេល៧សប្តាហ៍កន្លងមក នៅក្នុងសហគមន៍ថៃ រកមិនឃើញមានករណីឆ្លងកូវីដ-១៩នោះឡើយ លើកលែងតែអ្នកចូលមកពីក្រៅតែប៉ុណ្ណោះ ៕
