ខេត្តកណ្តាល៖ រថយន្តដឹកទំនិញធន់ធ្ងន់២គ្រឿងបានបើកបុកគ្នាចំពីមុខពេញទំហឹងកាលពីវេលាម៉ោង៥និង៣០នាទីព្រឹកព្រលឹម ថ្ងៃទី២៩ ខែមករា ឆ្នាំ២០១៦ នៅលើកំណាត់ផ្លូវជាតិលេខ៤ ចន្លោះគីឡូម៉ែត្រលេខ៣០ និងលេខ៣១ ភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល បណ្តាលអោយអ្នកបើកបររថយន្តម្នាក់ស្លាប់គៀបជាប់នៅក្នុងកាប៊ីន ចំណែកអ្មកបើកបរ រថយន្តបង្ករត់គេចខ្លួនបាត់ ។
រថយន្តបង្កម៉ាក FUZU ប្រភេទសណ្ដោងរ៉ីម៉ក ពណ៌ខ្លាញ់ក្ដាម ពាក់ផ្លាកលេខ ភ្នំពេញ 3C-2236 ក្រោយបង្កហេតុ អ្នកបើកបរ រត់គេចខ្លួនបាត់ ចំណែករថយន្តមួយគ្រឿងទៀតម៉ាក ហ៊ីណូ ពណ៍ក្រហម ពាក់ស្លាកលេខ ភ្នំពេញ 3A-0093 បើកបរដោយឈ្មោះគង់ ធូលី ភេទប្រុស អាយុ៣៧ឆ្នាំ មានទីលំនៅភូមិស្រែរនោង ឃុំស្រែរនោង ស្រុកត្រាំកក់ ខេត្តតាកែវ ស្លាប់គៀបជាប់នៅក្នុងកាប៊ីនរថយន្ត ។
នគរបាលចរាចរស្រុកអង្គ ស្នួលបានអោយដឹងថា មុនពេលគ្រោះថ្នាក់សាក្សីបានឃើញ រថយន្តបង្ករម៉ាក ហ្វុយហ្សូ បើកក្នុងទិសខាង កើតទៅ លិច ពោលគឺពី ភ្នំពេញទៅកំពង់សោម ទៅដល់កន្លែងកើតហេតុ បានជ្រុលចង្កូតទៅបុករថយន្ត១គ្រឿងទៀតម៉ាក HINO ដែលកំពុងបើកបរក្នុង ទិសដៅផ្ទុយគ្នាពីកំពង់សោមទៅភ្នំពេញ ចំពីមុខពេញទំហឹង បណ្ដាលរថយន្តទាំង២ ធ្លាក់ចូលក្នុងប្រឡាយទឹក ខាងត្បូងផ្លូវជាតិ ហើយអ្នកបើកបររថយន្តបង្ករត់គេចខ្លួនបាត់ ។
ក្រោយកើតហេតុមធ្យោយបាយទាំងពីរ កំលាំងជំនាញ បានធ្វើការវាស់វែងយកមករក្សាទុកនៅអធិការដ្ឋាននគរបាល ស្រុកអង្គស្នួល ដើម្បីកសាងសំណុំរឿង តាមនិតិ វិធីច្បាប់ ៕
ដោយ៖ សណ្តោស
