ភ្នំពេញ៖សម្រាប់ការប្រកួតកីឡាប្រដាល់ក្បាច់គុនបុរាណខ្មែរវគ្គពាក់កណ្ដាលផ្ដាច់ព្រ័ត្រនេះកីឡាករ សុខ សុវណ្ណមកពីសមាគមកីឡាប្រដាល់ក្រសួងការពារជាតិត្រូវប៉ះជាមួយឌុម កែវដា មកពីក្លិបមកុដរាជសីហ៍ខណៈដែលកីឡាករសេក គឹមរួន របស់ក្លិបអង្គរមានជ័យខេត្តសៀម រាប ជួបជាមួយ ម៉ន ចាន់ដារ៉ា មកពីក្លិបការិយាល័យទី៥ កងទ័ពជើងគោកនាល្ងាចថ្ងៃសៅរ៍ទី៣០ ខែមករា ឆ្នាំ២០១៦នេះ លើសង្វៀនTIFFY ARENA ឆ្ពោះទៅដណ្ដើមជើងឯកអធិរាជស៊ីម៉ងត៍អូដ្ឋទម្ងន់៦០គីឡូក្រាម ។ជំនួបរវាងសុខ សុវណ្ណជើងខ្លាំងនិងធ្លាប់ឈ្នះខ្សែក្រវាត់ទម្ងន់៦០គីឡូក្រាមនេះម្តងរួចហើយ កាលពីពាក់កណ្ដាលឆ្នាំ២០១៥កន្លងទៅ។ សុវណ្ណ មានស្នៀតទាត់ល្អ កម្លាំងខ្លាំង វាយសម្រុក មិនដកដៃ ក្នុងបំណងចង់តែផ្តួលដៃគូឲ្យសន្លប់ក្នុងទឹកណាប៉ុណ្ណោះ។ ប៉ុន្តែនៅពេលជួបជាមួយ កីឡាករវ័យក្មេង ឌុម កែវដាសំបូរល្បិច និងស្នៀតវាយដូចផ្លេចបន្ទលនោះ សុខ សុវណ្ណអាច ជួបបញ្ហាគាំស្នៀតក៏ថាបានដែ។
ទាំងឌុម កែវដា និងសុខ សុវណ្ណ ពួកគេសុទ្ធតែមានការហ្វឹកហាត់យ៉ាងហ្មត់ចត់ បំផុតដើម្បី គោលដៅតែមួយគឺ មានឱកាសឡើងវគ្គផ្តាច់ព្រ័ត្រដណ្តើមជើងឯក អធិរាជស៊ីម៉ងត៍អូដ្ឋ ។ប៉ុន្តែ ក្នុងចំណោមអ្នកប្រដាល់២នាក់ខាងលើនេះ ត្រូវតែមានម្នាក់ធ្លាក់មកទើរត្រឹម ចំណាត់ថ្នាក់ លេខ៣ជាក់ជាពុំខាន់ឡើយ ។តើរវាងសុខ សុវណ្ណ និងឌុម កែវដា ណរណាឡើងវគ្គផ្តាច់?។
ទន្ទឹមនិងគ្នានេះដែរ កីឡាករ សេក គឹមរួន និង ម៉ន ចាន់ដារ៉ាក៏ត្រូវជែងដណ្តើមកៅអីវគ្គផ្តាច់ព្រ័ត្រដូចកីឡាករ២នាក់ខាងលើដែរ។គូទី២នេះត្រូវបានគេមើលឃើញថា កីឡាករ ម៉ន ចាន់ដារាមានឱកាសឡើងវគ្គផ្តាច់ព្រ័ត្រច្រើនជាង សេក គឹមរួនតាមរយៈកាយសម្បទា ហើយអ្នកលេងកណ្ដាប់ដៃថ្ម សេក គឹមរួន អាចនឹងជួបការលំបាក ព្រោះតែ ម៉ន ចាន់ដារ៉ាកំខ្ពស់ដៃជើងវែង ការប្រើស្នៀតកែងជង្គង់ និងទាត់ល្អ។
ចំពោះគូប្រកួតក្រៅពីគូដណ្តើមខ្សែក្រវាត់គឺកីឡា ម៉ន លីហួរ មកពីក្លិបការិយាល័យទី៥ កងទ័ពជើងគោក ជួបជាមួយកីឡាករយស់ សំអាល់ មកពីក្លិបឃ្លាំងមឿងកីឡា ក្នុងទម្ងន់៦០គីឡូក្រាម។
កីឡាករ សំរាំង កំសាន្ត មកពីក្លិបព្រៃទទឹងខេត្តបាត់ដំបង ត្រូវប្រកួតជាមួយ សៅ ប៊ុនធឿន របស់ក្លិបតាព្រហ្មមានជ័យ ក្នុងប្រភេទទម្ងន់៥៤គីឡូក្រាម រីឯសាំង គីម ក្លិបអេភូថងកីឡា ប្រកួតជាមួយ សូត្រ ខេវិន ក្លិបបក្សីស្លាបដែកក្នុងទម្ងន់៥១គីឡូក្រាម៕សារីម
