មន្ត្រីនៅក្នុងរដ្ឋ Zamfara នៃប្រទេសនីហ្សេរីយ៉ា​បានសម្រេច​រៀបចំកម្មវិធីប្តូរអាវុធយកសត្វគោ ដើម្បីកាត់បន្ថយអំពើហិង្សាប្រដាប់អាវុធនៅក្នុងរដ្ឋនេះ។ តាមរយៈកម្មវិធីខាងលើ កាំភ្លើងមួយដើមអាចប្តូរយកសត្វគោបាន២ក្បាល យកទៅចិញ្ចឹម។ មន្ត្រីរដ្ឋខាងលើ​បានបង្ហាញក្តីសង្ឃឹមថា គោលនយោបាយខាងលើនឹងកាត់បន្ថយអំពើហិង្សា​។
សហគមន៍រស់នៅដាច់ស្រយាល​ក្នុងរដ្ឋ​​ Zamfara ភាគខាងជើង​ប្រទេសនីហ្សេរីយ៉ា​​តែងតែប្រឈមមុខដោយអំពើហិង្សាប្រដាប់អាវុធដាក់គ្នា។ ក្រុមប្រដាប់អាវុធបានប្លន់យកសត្វចិញ្ចឹម​ ឬបង្កបទល្មើសផ្សេងៗ។
កម្លាំងទាហានរដ្ឋាភិបាល នីហ្សេរីយ៉ា​មិនអាច​បញ្ចប់​អំពើហិង្សានោះឡើយ​ ហើយមន្ត្រីក្នុងតំបន់​បាន​ពិភាក្សាជាច្រើនលើកជាមួយ បណ្តាសហគមន៍ដើម្បីបញ្ចប់អំពើហិង្សាឈានដល់សន្តិភាព​។
លោកBello Matawalle អភិបាលរដ្ឋ ​Zamfara កាលពីថ្ងៃទី​១៧​ខែកក្កដា បានលើកឡើងថាប្រសិនបើពលរដ្ឋរស់នៅក្នុងសហគមន៍ យកកាំភ្លើងទៅផ្តល់ឲ្យសមត្ថកិច្ចនោះ និឹងទទួលបានគោពីរក្បាល​វិញ​​។
អំពើហិង្សានៅតំបន់ភាគខាងជើងនៃប្រទេសនីហ្សេរីយ៉ា បានសម្លាប់មនុស្ស​ដល់ទៅ​៨ពាន់នាក់ និងជាង​២សែននាក់ ត្រូវភៀសខ្លួនទៅកាន់តំបន់មានសុវត្ថិភាពចាប់តាំងពីឆ្នាំ​២០១១មកទល់ពេលនេះ៕

ដោយ៖ ធី រីណា