ប្រធានាធិបតីរុស្ស៊ី លោក Vladimir Putin បានចេញបញ្ជាឲ្យកម្លាំងទាហានចាប់ផ្តើមធ្វើសមយុទ្ធជាបន្ទាន់ នៅតំបន់ភាគខាងត្បូងប្រទេសនេះ ដែលជាទីតាំងប្រឈមការវាយប្រហារភេរវកម្មខ្ពស់បំផុត។
នៅក្នុងសេចក្តីប្រកាសកាលពីថ្ងៃទី១៧ខែកក្កដា រដ្ឋមន្ត្រីក្រសួងការពារជាតិរុស្ស៊ីបានបញ្ជាក់ថា ប្រធានាធិបតីពូទីនបានបញ្ជាឱ្យធ្វើសមយុទ្ធជាបន្ទាន់ដោយមិនមានការព្រាងទុកឬប្រកាសឲ្យដឹងជាមុននោះឡើយ។
សារព័ត៌មាន The Moscow Times បានផ្សាយថា សកម្មភាពខាងលើ របស់លោកពូទីន គឺដើម្បីធានាដល់សន្តិសុខនៅក្នុងតំបន់ និងការត្រៀមលក្ខណៈជាប់ជានិច្ចរបស់កម្លាំងទាហានរុស្ស៊ីក្នុងការធ្វើសង្គ្រាម។
រដ្ឋមន្ត្រីក្រសួងការពារជាតិរុស្ស៊ីលោកSergei Shoigu បានបញ្ចាក់ថា «តាមការសម្រេចរបស់អគ្គមេបញ្ជាការកម្លាំងប្រដាប់អាវុធរុស្ស៊ី គឺប្រធានាធិបតីពូទីន កម្លាំងទាហានប្រចាំនៅតំបន់ភាគខាងត្បូង មានទាំងកម្លាំងទាហានជើងគោក ជើងទឹកនិងជើងអាកាស បានចាប់ផ្តើមធ្វើសមយុទ្ធជាបន្ទាន់មួយដើម្បីដាស់ស្មារតីត្រៀមលក្ខណៈជានិច្ចក្នុងការការពារជាតិ។
លោក Sergei Shoigu បានបន្តទៀតថា សមយុទ្ធយោធាមិនមានការព្រាងទុកគឺដើម្បីពង្រឹងសមត្ថភាពរបស់កម្លាំងទាហាន ត្រូវតែមានស្មារតីត្រៀមប្រយុទ្ធជានិច្ច ។ នៅក្នុងសមយុទ្ធនេះគឺជាផ្នែកមួយនៃសមយុទ្ធដើម្បីត្រៀមលក្ខណៈសម្រាប់ធ្វើយុទ្ធទ្រង់ទ្រាយធំ មានឈ្មោះថាKavkaz-2020 ដែលនឹងធ្វើឡើងនៅខែកញ្ញាខាងមុខ។នៅក្នុងសមយុទ្ធនាពេលនេះ មានទាហាន១៥០ពាន់នាក់ចូលរួម យន្តហោះចម្បាំង៤០គ្រឿង និងនាវាចម្បាំង១០៦គ្រឿងចូលរួម៕
ដោយ៖ ធី រីណា
