កម្លាំងទាហានឆត្រយោងឥណ្ឌា​​ បានហ្វឹកហាត់លោតឆត្រយោងចុះតំបន់នៅក្បែរ បឹង Pangong Tso ដែលជាតំបន់ដែលមានវិវាទ រវាងកម្លាំងទាហាន ឥណ្ឌានិងចិន។
សារព័ត៌មាន Sputnik បានផ្សាយថា នៅក្នុងឃ្លីបវីដេអូ បង្ហាញឲ្យឃើញថា កម្លាំងទាហានឆត្រយោងឥណ្ឌាបានលោតចុះពីយន្តហោះដឹកជញ្ជូនយោធា ប្រភេទLockheed C-130 Hercules ពីកម្ពស់ ៤៣៥០ គីឡូម៉ែត្រ។ សមយុទ្ធខាងលើធ្វើឡើងនៅថ្ងៃទី​១៧ ខែកក្កដា កន្លងមក នៅក្បែរបឹង ​Pangong Tso ក្នុងតំបន់ Stakna, ស្រុក Leh ស្ថិតនៅក្នុងរដ្ឋ Ladakh។
នៅក្នុងរូបភាពបង្ហាញឲ្យឃើញថា ទាហានឥណ្ឌាបានចុះដល់គោលដៅដេលបានកំណត់ទុកដោយមានសុវត្ថិភាព។ សកម្មភាពធ្វើសមយុទ្ធខាងលើ កើតឡើងចំពេលដែល​រដ្ឋមន្ត្រីការពារជាតិ ឥណ្ឌា លោកRajnath Singh បំពេញទស្សនកិច្ចរយៈពេល​២ថ្ងៃ​ទៅកាន់រដ្ឋ Ladakh ជាតំបន់ដែលមានវិវាទជាមួយចិននៅតាមព្រំដែន។ អមដំណើររដ្ឋមន្ត្រីការពារជាតិ មានអគ្គសេនាធិការកងទ័ពការពារជាតិឥណ្ឌា ឧត្តមសេនីយ៍ Bipin Rawat និងមេបញ្ជាការកងទ័ពជើងគោក ឧត្តមសេនីយ៍Manoj Mukund Naravane ។
ភាពតានតឹងនៅតាមបណ្តោយព្រំដែនឥណ្ឌា-ចិន កាន់តែខ្លាំងឡើង​​នៅរដ្ឋLadakh និងតំបន់ជាច្រើនទៀតនៅតាមបណ្តោយព្រំដែន​ LAC មានប្រវែង ដល់ទៅ​ ៤០៥៧ គីឡូម៉ែត្រ។​ ការប៉ះទង្គិចគ្នា កាលពីថ្ងៃទី​១៥ខែមិថុនា បណ្តាលឲ្យទាហានឥណ្ឌា ២០នាក់ស្លាប់ ចំណែកភាគីចិនវិញមិនបានប្រកាសឡើយ តែឥណ្ឌាបញ្ជាក់ថាមានទាហានស្លាប់​៤៣នាក់៕ ដោយ៖ធីរីណា