អន្តរជាតិ៖ នៅថ្ងៃទី ២១ ខែកក្កដា ឆ្នាំ២០២០ រដ្ឋាភិបាលនេប៉ាល់ បានប្រកាសថា ខ្លួននឹងបើកដំណើរការជើងហោះហើរអន្តរជាតិឡើងវិញ នៅពាក់កណ្ដាលខែសីហាខាងមុខ ក្នុងគោលដៅជំរុញវិស័យទេសចរណ៍ដែលរងគ្រោះដោយសារ COVID-19 អស់រយៈពេលជាច្រើនខែកន្លងទៅនេះ ។
ទីភ្នាក់ងារព័ត៌មាន AFP បានចេញផ្សាយដោយដកស្រង់ប្រសាសន៍ រដ្ឋមន្ត្រីទេសចរណ៍ និងអាកាសចរណ៍ស៊ីវិលនេប៉ាល់ Yogesh Bhattarai បានអះអាងថា ការសម្រេចចិត្តបើកជើងហោះហើរទាំងក្នុងស្រុក និងអន្តរជាតិជាថ្មីនេះ គឺចាប់ពីថ្ងៃទី១៧ ខែសីហានេះ បន្ទាប់ពីមានការលើកឡើងក្នុងកិច្ចប្រជុំគណៈរដ្ឋមន្ត្រីមួយ កាលពីថ្ងៃទី ២០ ខែកក្កដាថ្មីៗនេះ ។
លោករដ្ឋមន្ត្រី បន្ថែមថា រាល់អ្នកដំណើរដែលមកដល់ និងចាកចេញ នឹងតម្រូវឲ្យមានលិខិតបញ្ជាក់ថា ពួកគេគ្មានជំងឺ COVID-19 ហើយអ្នកដំណើរដែលមកដល់ទឹកដីនេប៉ាល់ ក៏នឹងតម្រូវឲ្យធ្វើចត្តាឡីស័កផងដែរ ។ ក៏ប៉ុន្តែលោកពុំបានបញ្ជាក់ពេលវេលាជាក់លាក់នៃការធ្វើចត្តាឡីស័កឡើយ ។ លោករដ្ឋមន្រ្តី សង្កត់ធ្ងន់ថា«ខាងក្រសួងកំពុងធ្វើការលើវិធានសុវត្ថិភាពសម្រាប់ការគ្រប់គ្រងព្រលានយន្តហោះ ប្រតិបត្តិករជើងហោះហើរ និងអ្នកដំណើរសម្រាប់គោលបំណងនេះ»។
គួរបញ្ជាក់ថា នេប៉ាល់ដែលជាប្រជាជាតិក្នុងតំបន់អាស៊ីខាងត្បូង បានបិទព្រលានយន្តហោះខ្លួន ចាប់តាំងពីចុងខែមីនា ដើម្បីប្រយុទ្ធនឹងការរាលដាល COVID-19 ដែលមកដល់ពេលនេះប្រទេសមួយនេះ បានចម្លងមនុស្ស១៧, ៨៤៤នាក់ ហើយអ្នកស្លាប់ មានចំនួន៤០នាក់ ។ ចំពោះការបិទជើងហោះហើរនេះ បានប៉ះពាល់ធ្ងន់ធ្ងរដល់វិស័យទេសចរណ៍ដែលជាវិស័យដ៏សំខាន់មួយរបស់សេដ្ឋកិច្ចប្រទេសនេះផងដែរ ។
ដោយឡែកយោងតាមរបាយការណ៍របស់រដ្ឋាភិបាលប្រទេសនេប៉ាល់ បានបញ្ជាក់ថា ប្រមាណ១ភាគ៣ នៃអ្នកដំណើរសរុបទាំង១,២លាននាក់ ដែលទៅលេងកម្សាន្តនៅនេប៉ាល់កាលពីឆ្នាំមុន គឺស្ថិតក្នុងអំឡុងរដូវស្លឹកឈើជ្រុះ (ចន្លោះពីថ្ងៃទី២២ កញ្ញា ដល់ ថ្ងៃទី ២១ ធ្នូ) ។ ដោយអ្នកទេសចរទាំងនោះ គឺភាគច្រើនជាអ្នកចូលចិត្តដើរកម្សាន្តតាមព្រៃភ្នំ ៕ដោយ៖ស តារា
