ភ្នំពេញ៖ ជនសង្ស័យម្នាក់ បានលួចម៉ូតូពីយុវជនម្នាក់ទៀតដែលត្រូវជាមិត្តភក្តិនឹងគ្នា ខណៈកំពុងដេកក្នុងផ្ទះសំណាក់ជាមួយគ្នាយកទៅបញ្ចាំយកលុយស៊ីចាយហើយគេចខ្លួនបានជាង១ខែត្រូវម្ចាស់ម៉ូតូតាមរកឃើញក៏ឃាត់ខ្លួន ប្រគល់ឱ្យសមត្ថកិច្ចយកទៅចាត់ការតាមច្បាប់។

ហេតុការណ៍នេះបង្កឲ្យមានការភ្ញាក់ផ្អើលកាលពីវេលាម៉ោង១១ និង ៥០នាទីយប់ថ្ងៃទី ២២ ខែកក្កដា ឆ្នាំ២០២០ នៅក្បែររោងចក្រទឹកកក ស្ថិតនៅតាមបណ្តោយផ្លូវលេខ២០០២ ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។

ជនសង្ស័យមានឈ្មោះ អ៊ំ វុត្ថា ភេទប្រុសអាយុ ២១ឆ្នាំ មុខរបរមិនពិតប្រាកដស្នាក់នៅជាមួយម្ដាយក្នុងសង្កាត់ទឹកថ្លា ខណ្ឌសែនសុខ។ចំណែកជនរងគ្រោះមានឈ្មោះខុន វិផា ភេទប្រុស អាយុ២៣ ឆ្នាំ ស្នាក់នៅជាមួយម្ដាយក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ រីឯម៉ូតូដែលជនសង្ស័យលួចម៉ាកហុងដាឌ្រីម ស៊េរីឆ្នាំ២០២០ ពណ៌ស ពាក់ស្លាកលេខភ្នំពេញ1IB-9414។

តាមការរៀបរាប់ពីជនរងគ្រោះ បានឲ្យដឹងថា ជនសង្ស័យនិងរូបគេត្រូវជាមិត្តភក្តិនឹងគ្នាតាំងពីនៅវ័យកុមារមកម្ល៉េះ ហើយនៅថ្ងៃទី ១៨ ខែមិថុនាឆ្នាំ ២០២០ រូបគេនិងជនសង្ស័យបានជិះម៉ូតូទៅដេកនៅផ្ទះសំណាក់យីហោដារីយ៉ា នៅម្ដុំផ្លូវលេខ២០០៤ ក្នុងសង្កាត់អូរបែកក្អម ខណ្ឌសែនសុខ។ លុះនៅវេលាទៀបភ្លឺ រូបគេកំពុងតែដេកលក់ស្រាប់តែជនសង្ស័យបានលួចយកម៉ូតូទៅបាត់ហើយបានគេចខ្លួនតាំងពីថ្ងៃនោះមក។

ប្រភពដដែលបានបន្តទៀតថា ក្រោយពីបាត់ម៉ូតូបានរយៈពេល ២ថ្ងៃរូបគេក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលអូរបែកក្អម ដើម្បីឱ្យសមត្ថកិច្ចជួយស្រាវជ្រាវនិងរកចាប់ខ្លួនជនសង្ស័យដែរ។ ចំណែកជនសង្ស័យបានព្យាយាម គេចខ្លួនរយៈពេលជាង១ ខែ លុះមកដល់ថ្ងៃកើតហេតុរូបគេក៏ប្រទះឃើញជនសង្ស័យដោយចៃដន្យនៅចំណុចទីតាំងកើតហេតុខាងលើក៏ឃាត់ប្រគល់ជូនសមត្ថកិច្ចតែម្តង។

បើតាមចម្លើយជនសង្ស័យបានសារភាពថាម៉ូតូដែលរូបគេលួចយកទៅនោះគឺយកទៅបញ្ចាំនៅហាងមួយកន្លែងដោយបានលុយចំនួន៥០០ ដុល្លារហើយបានចែកទៅឲ្យម្ដាយទុកគ្រាន់ទិញប្រហិតយកមកលក់ និងមួយចំនួនទៀតរូបគេទុកគ្រាន់សុីចាយ។

បច្ចុប្បន្នជនសង្ស័យខាងលើត្រូវបានកម្លាំងសមត្ថកិច្ចនាំខ្លួនមកសួរនាំនៅប៉ុស្តិ៍នគរបាលរដ្ឋបាលអូរបែកក្អម ដើម្បីធ្វើកំណត់ហេតុនិងបញ្ជូនបន្តដើម្បីចាត់ការទៅតាមនីតិវិធីច្បាប់៕ដោយ៖ ផេងភាព