ភ្នំពេញ ៖ កម្លាំងគណៈបញ្ជាឯកភាពរាជធានីភ្នំពេញ បានសហការជាមួយអាជ្ញាធរមូលដ្ឋានខណ្ឌសែនសុខ រួមជាមួយកម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ចុះឆ្មក់បង្ក្រាបទីតាំងក្លិបកម្សាន្តយីហោ ហ្គោលឡាញ ដែលបន្លំធ្វើជាភោជនីយដ្ឋាន និងផប់ ស្ថិតនៅតាមបណ្តោយផ្លូវលេខ១៩៨៦ ក្នុងសង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង១២និង២០នាទីរំលងអាធ្រាត្រឈានចូលថ្ងៃទី២៨ ខែកក្កដា ឆ្នាំ២០២០ ដោយឃាត់ខ្លួនយុវជនប្រុសស្រីជិត៣០០នាក់បញ្ចូនទៅកាន់ស្នងការដ្ឋាននគរបាលរាជធានីភ្នំពេញដេីម្បីសួរនាំនិងចាត់ការតាមនីតិវិធី ។
ក្នុងកិច្ចប្រតិបត្តិការខាងលេីនេះគឺមានការសម្របសម្រួលពីលោក សាយ ណូរ៉ា ព្រះរាជអាជ្ញាររងអមសាលាដំបូងរាជធានីភំ្នពេញ សហការជាមួយលោកមាន ចាន់យ៉ាដា អភិបាលរងរាជធានីភ្នំពេញ លោក ប៊ុត សត្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ លោក ម៉ូវ ម៉ានិត អភិបាលខណ្ឌសែនសុខ លោក ហួរ ម៉េងវ៉ាង អធិការនគរបាលខណ្ឌសែនសុខ ព្រមទាំងមន្ត្រីជាច្រេីនរូបចូលរួមផងដែរ ។
ជាមួយគ្នានោះ លោក មាន ចាន់យ៉ាដា អភិបាលរងរាជធានីភ្នំពេញ បានបញ្ជាក់ថា ការចុះបិទក្លិបនេះគឺដោយសារក្លិបនេះមិនស្តាប់តាមការណែនាំរបស់រាជរដ្ឋាភិបាលដែលបានចេញអនុក្រឹត្យនាពេលកន្លងមក ។ ក្នុងនោះសមត្ថកិច្ចជំនាញបានឃាត់ខ្លួនមនុស្សប្រុសស្រីជិត៣០០នាក់បញ្ចូនទៅកាន់ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ ដេីម្បីចាត់ការតាមនីតិវិធី ៕ ដោយ៖ ភារ៉ា ដង្កោ
