អាមេរិក៖តាមតួលេខរបស់សារព័ត៌មានរ៉យទ័របានផ្សាយថា​ ចំនួនអ្នកស្លាប់ដោយកូវីដ​-១៩នៅអាមេរិកបានកើនឡើងលឿនបំផុតមិនធ្លាប់មានក្នុងរយៈពេល​២ខែកន្លងមក​នេះ។ ក្នុងចំណោម២០ប្រទេសដែលមានអ្នកឆ្លងកូវីដ​-១៩ច្រើនជាងគេបំផុត ​គឺអាមេរិកឈរលំដាប់ទី​៦​ស្តីអំពីចំនួនអ្នកស្លាប់គិតតាមចំនួនអ្នកឆ្លងនៅអាមេរិក ដោយក្នុងចំណោមពលរដ្ឋអាមេរិក១សែននាក់ដែលឆ្លងកូវីដ​-១៩ មានអ្នកស្លាប់​៤៥នាក់។
គិតដល់ព្រឹកថ្ងៃទី ៣០ ខែកក្កដា តាមតួលេខរបស់Worldometers នៅទូទាំងពិភពលោកមានអ្នកឆ្លងកូវីដ​-១៩​ជាង​១៧លាននាក់ និងស្លាប់ ជាង​៦៦៩ពាន់នាក់​។ ចំណែកអាមេរិកវិញ មានអ្នកឆ្លងកូវីដ​-១៩ថ្មី​ក្នុងរយៈពេល២៤ម៉ោងមានដល់ទៅ​ជាង​៦៦ពាន់នាក់ និងស្លាប់ជាង​១៣០០នាក់​។ អាមេរិកមានអ្នកឆ្លងសុរបទាំងអស់​ជាង​៤,៥លាននាក់ និងស្លាប់ជាង​១៥៣ពាន់នាក់ ។
ក្នុងរយៈពេល​៣ថ្ងៃកន្លងមក អាមេរិកមានចំនួនអ្នកឆ្លងកូវីដ​-១៩ ច្រើនជាង​៦០ពាន់នាក់​ក្នុងមួយថ្ងៃៗ ចំណែកអ្នកស្លាប់ក៏កើនឡើងផងដែរ​។​​ ចំនួនអ្នកឆ្លងកូវីដ​-១៩ ភាគច្រើន នៅក្នុងរដ្ឋ Arizona, California, Florida និង Texas ក្នុងរយៈពេលចុងក្រោយនេះ​ធ្វើឲ្យមន្ទីរពេទ្យ ពេញទាំងអស់ មិនមានកន្លែងសម្រាប់អ្នកជំងឺថ្មី​ឡើយ។
វីរុសកូវីដ-១៩​បានរាលដាលយ៉ាងខ្លាំងនៅអាមេរិក ធ្វើឲ្យសេដ្ឋកិច្ចប្រទេសនេះជួបផលលំបាកយ៉ាងខ្លាំង​។ ​រដ្ឋជាច្រើនក៏បានស្នើដល់បណ្តាសាលារៀនបន្តបិទទ្វារ​បញ្ចៀសការឆ្លងកាន់តែច្រើនថែមទៀត​៕