ខេត្តបន្ទាយមានជ័យៈបុរសម្នាក់ខណ:ទៅមើលស្រូវនៅវាលស្រែចៃដន្យត្រូវរន្ទះបាញ់បណ្តាលឲ្យបាត់បង់ជីវិតបង្ក ភ្ញាក់ផ្អើលនៅវេលាម៉ោង៥និង៥០នាទីល្ងាចថ្ងៃទី២៩ខែកក្កដាឆ្នាំ២០២០ នៅត្រង់ចំណុចលើភ្លឺស្រែខាងកើតសំណង់ស្ទាក់ទឹកស្ពានទី២ ចម្ងាយប្រហែល៤០០ម៉ែត្រ ស្ថិតក្នុងភូមិពោធិ៍រាំបុណ្យ ឃុំពន្លៃ ស្រុក ភ្នំស្រុក ។
ប្រភពពីមន្រ្តីនគរបាលស្រុភ្នំស្រុក បានឲ្យដឹងថាជនរងគ្រោះដែលស្លាប់ឈ្មោះ ជិន ឡាសី ភេទប្រុស អាយុ៤១ឆ្នាំរស់នៅភូមិប៉ោយចារ ឃុំប៉ោយចារ ស្រុកភ្នំស្រុក ។
នគរបាលដដែលបញ្ជាក់ថាតាមការបំភ្លឺពីក្រុមគ្រួសារ នៅថ្ងៃកើតហេតុជនរងគ្រោះបានទៅមើលស្រូវនៅវាលស្រែតែម្នាក់ឯងនៅ ខាងកើតសំណង់ស្ទាក់ទឹកស្ពានទី២ ចម្ងាយប្រហែល៤០០ម៉ែត្រ ស្ថិតក្នុងភូមិពោធិ៍រាំបុណ្យ ឃុំពន្លៃ ខណ:ល្ងាចនោះមេឃមានធ្លាក់ភ្លៀង លាយឡំជាមួយខ្យល់ផ្គររន្ទះ។ ក្រោយមកដោយមិនឃើញជនរងគ្រោះត្រឡប់មកផ្ទះវិញសាច់ញាតិបានទូរស័ព្ទរកជនរងគ្រោះតែមិនចូល ក៏នាំបងប្អូនមកតាមមើលនៅវាលស្រែ ក៏ប្រទះឃើញជនរងគ្រោះដេកស្លាប់នៅលើភ្លឺស្រែយ៉ាងអាណោចអាធ័មក៏មានការភ្ញាក់ផ្អើលឆោឡោដល់អាជ្ញាធរមូលដ្ឋាននិងសមត្ថកិច្ចតែម្តង។
នគរបាលជំនាញបានបញ្ជាក់ថាឆ្លងតាមការត្រួតពិនិត្យលើខ្លួនសព ជនរងគ្រោះគឺពិតជាស្លាប់ដោយសាររន្ទះបាញ់ប្រាកដមែន ដោយពុំមានស្លាកស្នាមអ្វីទាក់ទងនឹងករណីឃាតកម្មនោះឡើយ។ក្រោយពីពិនិត្យរួច សពត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕

ដោយ÷ វណ្ណា