អន្តរជាតិ៖ បន្ទាប់ពីប្រទេសឥណ្ឌា ទើបបានទទួលយន្តហោះចម្បាំងថ្មី៥គ្រឿងប្រភេទ Rafale ដែលទិញពីបារាំងភ្លាមៗ នៅថ្ងៃទី២៩ ខែកក្កដាម្សិលមិញនេះ រដ្ឋមន្ត្រីការពារជាតិឥណ្ឌា Rajnath Singh ក៏បោះសម្ដីដាក់ប្រទេសចិនថា៖ យន្តហោះចម្បាំងនេះ នឹងជួយការពារការគំរាមនានា ហើយប្រទេសដែលប៉ងឈ្លានពានឥណ្ឌា នឹងព្រួយបារម្ភមិនខាន ។
សូមជម្រាបថា យន្តហោះចម្បាំងនេះ មកដល់ទឹកដីឥណ្ឌាចំពេលភាពតានតឹងរវាងឥណ្ឌា និងចិននៅព្រំដែន។ ការប៉ះទង្គិចចុងក្រោយបណ្ដាលឲ្យយោធាប្រមាណ២០នាក់ស្លាប់ ខណៈខាងចិនមិនបញ្ចេញរបាយការណ៍អ្វីឡើយ។ នាយករដ្ឋមន្ត្រីឥណ្ឌា នារិន្ទ្រា ម៉ូឌី បានស្វាគមន៍ការមកដល់យន្តហោះ Rafale ទាំង៥គ្រឿងនេះ ដោយបានបង្ហោះសារនៅ Twitter របស់លោកថា គ្មានការលះបង់ណា ឬសកម្មភាពល្អណាដូចការការពារជាតិឡើយ។
រដ្ឋមន្ត្រីការពារឥណ្ឌាលោក Rajnath Singh វិញ ក៏ចេញមកស្វាគមន៍វត្តមានយន្តហោះចម្បាំងថ្មីនេះ ដោយលោកអះអាងថា ជាការចាប់ផ្ដើមសករាជថ្មីនៃយោធាឥណ្ឌា។ លោក Singh បានសរសេរលើ Twitter របស់លោកទៀតថា កងទ័ពអាកាសឥណ្ឌា អាចមានសមត្ថភាពរបស់ខ្លួនដើម្បីកំញើញការគំរាមទាំងឡាយទៀតផង។ ប្រមុខការពារជាតិឥណ្ឌារូបនេះ ក៏ឆ្លៀតផ្ញើសារព្រមានទៅកាន់ចិនដែលទើបប៉ះគ្នាថ្មីៗ។
«ប្រសិនបើមានអ្នកណាបារម្ភពីសមត្ថភាពថ្មីរបស់កងទ័ពអាកាសឥណ្ឌា វាគួរតែជាអ្នកដែលចង់គំរាមបូរណភាពទឹកដីរបស់ខ្លួន។» លោកSingh សរសេរបែបនេះលើ Twitter របស់លោក។ ទោះមិននិយាយចំឈ្មោះចិន សំណេរបែបនេះ ក៏មិនមានន័យសំដៅប្រទេសណាក្រៅពីអ្នកជិតខាងមួយនេះ ឬក៏ប៉ាគីស្ថានផងក៏ថាបាន។
គួរបញ្ជាក់ថា យន្តហោះចម្បាំងទំនើប Rafale ចំនួន៥គ្រឿង បានទៅដល់មូលដ្ឋានអាកាស Ambala ក្នុងរដ្ឋ Haryana នៅថ្ងៃទី២៩ ខែកក្កដាក្រោយធ្វើដំណើរពីបារាំង។ យន្តហោះទាំង៥គ្រឿងនេះ ជាផ្នែកមួយគម្រោងទិញយន្តហោះ៣៦គ្រឿង ដែលឥណ្ឌាទិញពីបារាំងក្នុងតម្លៃប្រមាណ៩,៥ពាន់លានដុល្លារ។ បារាំង ត្រូវដឹកយន្តហោះឲ្យឥណ្ឌាឲ្យគ្រប់ចំនួននៅត្រឹមចុងឆ្នាំ២០២១ ។ ប្រជាជនរស់នៅក្បែរមូលដ្ឋាននេះមិនត្រូវបានអនុញ្ញាតឲ្យថតរូប ឬវីដេអូយន្តហោះឡើយ។
ទាក់ទងការទិញយន្តហោះនេះដែរ ឥណ្ឌាធ្លាប់ទទួលស្គាល់ថា កម្លាំងយោធារបស់ខ្លួននៅស្ទើរណាស់ បើធៀបនឹងចិន។ដោយការទិញយន្តហោះដល់ទៅជិត៤០គ្រឿងនេះ ជាផ្នែកមួយនៃការពង្រឹងកម្លាំងយោធាអាកាសផង និងកម្លាំងទ័ពទាំងជាង១,៤លាននាក់ផង។ ខណៈទំនាក់ទំនងជាមួយចិន និងប៉ាគីស្ថានមិនសូវល្អ ឥណ្ឌារឹតតែត្រូវពង្រឹងសមត្ថភាពយោធារបស់ខ្លួនថែមទៀត៕ដោយ៖ស តារា
