ភ្នំពេញ៖ ពិតជាមានល្បិចចេតនាទុច្ចរិតគិតទុកជាមុន យ៉ាងជំនាញ ដើម្បីឆបោកអោយជនរងគ្រោះមានជំនឿ តែទីបំផុត ការឆបោកគេ៥នាក់លក់វត្ថុស័ក្តិសិទ្ធិសំរឹទ្ធិគោបា បានលុយជិត១៦ម៉ឺនដុល្លារ ចុងក្រោយជាប់ខ្នោះសមត្ថកិច្ចបានដូចបំណង។

សូមរំលឹកថា៖ កាលពីថ្ងៃទី០១ ខែសីហា ឆ្នាំ២០២០ ដោយមានការចង្អុលបង្ហាញពី លោកឧត្តមសេនីយ៍ឯក អុិន បូរ៉ា អគ្គស្នងការរង ទទួលផែន នាយកដ្ឋានកណ្តាលនគរបាលយុត្តិធម៌ និងលោក ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ កម្លាំងនាយកដ្ឋាននគរបាលព្រហ្មទណ្ឌ ដឹកនាំដោយលោក វរសេនីយ៍ឯក ខេង ម៉េងឈាង នាយការិយាល័យព្រមហ្មទណ្ឌកំរិតស្រាល សហការជាមួយកម្លាំងស្នងការដ្ឋាននគរបាលខេត្តកំពង់ស្ពឺ បង្ក្រាបជាក់ស្តែង ករណីឆបោក (លក់វត្ថុស័ក្តិសិទ្ធិគោបា) ត្រង់ចំណុច ភូមិត្រពាំងជ្រៃ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ បានឃាត់ខ្លួនជនសង្ស័យ ០១នាក់ ឈ្មោះ រិន សុភ័ក្រ្ត ហៅ រិន សារ៉េត (រ៉ា) ពាក់ព័ន្ធករណី ឆបោក (លក់វត្ថុស័ក្តិសិទ្ធិ គោបា) ដេីម្បីយកមកសាកសួរ នៅការិយាល័យជំនាញ ។

ប្រភពពីនគរបាលព្រហ្មទណ្ឌកម្រិតស្រាលបានអោយដឹងថា៖ តាមចម្លើយរបស់ឈ្មោះ រិន សុភ័ក្ត្រ ហៅ រិន សារ៉េត បានសារភាពថា ខ្លួនពិតជាបានធ្វេីសកម្មភាពឆបោក យកប្រាក់ពីជនរងគ្រោះ ភេទប្រុស អាយុ ៦២ឆ្នាំ ជនជាតិខ្មែរ ចំនួន ១០០,០០០$ (ដប់ម៉ឺនដុល្លារអាមេរិក) ប្រាកដមែន ។

សមត្ថកិច្ចបន្តថា សំភារៈចាប់យករួមមាន៖ 

– រថយន្ត ០១គ្រឿង ម៉ាក Lexus RX 300 ផលិតឆ្នាំ១៩៩៨ ពណ៌ទឹកមាស ពាក់ស្លាកលេខ កំពង់ចាម 2C-2324។

– ទូរស័ព្ទ ០៣គ្រឿង ទី១.ម៉ាកណូគៀ ចុចពិលពណ៌ខ្មៅ ០១គ្រឿង និងទូរស័ព្ទម៉ាក SAMSUNG ចំនួន០២គ្រឿង

– លោហៈធាតុ ពណ៌ខ្មៅ (រូបកូនគោ) ដាក់ក្នុងប្រអប់ពណ៌ខ្មៅចំនួន០១។

– គាថា រុំស្កុតចំនួន០១។

– ប្រេងសម្រាប់លាបវត្ថុ(កូនគោពណ៌ខ្មៅ)។

– ក្រណាត់ស។

– ឈេីគូសមួយចំនួនធំ។

– គាថា ស្លឹករឹត ចំនួន០១។

– ឯកសារពាក់ព័ន្ធ នឹងការទិញលក់វត្ថុបុរាណមួយចំនួន។

សូមបញ្ជាក់ថា៖ បច្ចុប្បន្នជនជងស្ស័យខាងលើ ការិយាល័យជំនាញបានសាកសួរ និងកសាងសំណុំរឿង ទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី។ គួររំលឹកដែលថា កាលពីថ្ងៃទី២១ ខែឧសភា ឆ្នាំ២០២០ លោក វរសេនីយ៍ឯក ព្រំ សារឿន នាយការិយាល័យអនុវត្តដីកា បានធ្វើការឃាត់ខ្លួនឈ្មោះ សៀវ សុខនឿន ភេទប្រុស អាយុ ៤១ឆ្នាំ តាមបណ្តឹងរបស់ជនរងគ្រោះចំនួន ០៥នាក់ ក្នុងករណីឆបោកប្រាក់ចំនួន ១៥៩,៥០០$ (ដប់ប្រាំម៉ឺនប្រាំបួនពាន់ប្រាំរយដុល្លារអាមេរិក)ឆបោកលក់សំរឹទ្ធិគោបា ។ ក្រោយពីធ្វើការសាកសួរ ឈ្មោះ ស៊ីវ សុខនឿន បានសារភាពថា ខ្លួនរួមជាមួយបក្ខពួកឈ្មោះ រិន សុភ័ក្ត្រ ហៅ រិន សារ៉េត ពិតជាបានប្រព្រឹត្តករណី ឆបោកប្រាក់ ពីជនរងគ្រោះទាំង ០៥នាក់ខាងលើប្រាកដមែន ។

សម្ភារ:ដកហូតរួមមាន៖

១.ក្រឡពណ៌ក្រហមចំនួន ០២, ខ្សែកអំបោះ ចំនួន០២ខ្សែ

២.ទូរដែកចំនួន ០១, ក្រឡទឹកចំនួន ០១, អំបោះឆៅចំនួន១ដុំ ក្រោយពីការសួរនាំឈ្មោះ ស៊ីវ សុខនឿនរួច នាយកដ្ឋាននគរបាលព្រហ្មទណ្ឌ បានបញ្ជូនជនសង្ស័យឈ្មោះ ស៊ីវ សុខនឿន ទៅអយ្យការអមសាលាដំបូងរាជធានីភ្នំពេញ បន្ទាប់មកនៅថ្ងៃទី២៤ ខែឧសភា ឆ្នាំ២០២០ លោក ឡុង វណ្ណា ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឲ្យឃុំខ្លួនឈ្មោះ ស៊ីវ ស៊ីនឿន នៅពន្ធនាគារមណ្ឌលអប់រំកែប្រែទី១ (ម១) ។

លុះដល់ថ្ងៃទី០២ ខែសីហា ឆ្នាំ២០២០ នាយកដ្ឋាននគរបាលព្រហ្មទណ្ឌ បានទទួលដីកាចាត់ឲ្យស៊ើបសួរជំនួសលេខ ៤៤១ ព្រទ ចុះថ្ងៃទី០២ ខែកក្កដា ឆ្នាំ២០២០ របស់លោក ស៊ លីនណា ចៅក្រមស៊ើបសួរ នៃសាលាដំបូងរាជធានីភ្នំពេញ ឲ្យរកសាវតាជាតិរបស់ឈ្មោះ រិន សារ៉េត ហៅ រិន សុភ័ក្ត្រ ភេទប្រុស អាយុ៤១ឆ្នាំ ជនជាតិខ្មែរ៕

ប្រភព៖ ការិយាល័យនគរបាលព្រហ្មទណ្ឌកម្រិតស្រាល