ភ្នំពេញ៖ ដោយសារតែការច្រណែន និងខ្វះការយោគយល់គ្នា បានធ្វើឲ្យអ្នករកស៊ីលក់សាំងដប និងអ្នកលក់ខោអាវជជុះនៅជាប់របងមជ្ឍមណ្ឌលម៉ុងឌីយ៉ា បានឈ្មោះប្រកែគ្នារហូតដល់ផ្ទុះហិង្សាវាយគ្នាទៅវិញទៅមកសន្លប់រៀងៗខ្លួន ព្រោះតែភាគីខាងអ្នកលក់ខោអាវជជុះ បានខ្ចីលុយអ្នកលក់សាំង៥០ដុល្លារ ពេលភាគីអ្នកលក់សាំងទៅទារលុយថ្លៃជំពាក់ មិនព្រមសងគេ ថែមទាំងវ៉ៃគេហើយធ្វើឲ្យសន្លប់ខ្លួនឯង ។
ហេតុការណ៍នេះ បានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី០២ ខែកុម្ភៈ ឆ្នាំ២០១៦ នៅចំណុចជាប់របងមជ្ឍមណ្ឌលម៉ុងឌីយ៉ា តាមបណ្ដោយផ្លូវលេខ២៣០ សង្កាត់ផ្សារដើមគរ ខណ្ឌទួលគោគ រាជធានីភ្នំពេញ ។
តាមប្រភពព័ត៍មានពីសមត្ថកិច្ចមូលដ្ឋាន បានឲ្យដឹងថា នៅមុនពេលកើតហេតុ គឺភាគីខាងក្រុមគ្រួសារអ្នកលក់សាំងបានជំពាក់លុយ ភាគីខាងអ្នកលក់ខោអាវជជុះចំនួន៥០ដុល្លារ ពេលនោះអ្នកលក់សាំងបានទៅទារលុយជំពាក់ពីភាគីខាងអ្នកលក់ខោអាវជជុះ តែមិនព្រមសងនោះទេ ហើយក៏មានការឈ្លោះគ្នារវាងម្ដាយនិងម្ដាយរបស់ភាគីទាំងសងខាង រហូតឈានទៅដល់ការប្រើអំពីហឹង្សាដាក់គ្នាទៅវិញទៅមក បណ្ដាលឲ្យរងរបួសសន្លប់រៀងៗខ្លួន បង្កឲ្យភ្ញាក់ផ្អើលដល់ប្រជាពលរដ្ឋនិងមត្ថកិច្ចមូលដ្ឋានតែម្តង ។
ក្រោយកើតហេតុភាគីទាំងសងខាង ដែលរងរបួសសន្លប់រៀងៗខ្លួននោះត្រូវបានក្រុមគ្រួសារដឹកយកទៅមន្ទីរពេទ្យផងដែរ ។
គួរបញ្ជាក់ផងដែរថា បើតាមសំដីរបស់សមត្ថកិច្ចមូលដ្ឋាន បានឲ្យដឹងថា ស្ត្រីដែលជាអ្នកលក់ខោអាវជជុះនោះនៅពេលដែលអាជ្ញាធរចុះមករាប់សណ្ដាប់ធ្នាប់តាមផ្លូវសាធារណៈ គឺរូបគាត់តែងតែធ្វើសន្លប់រហូតផងដែរ ៕
ដោយ៖ ស ដារ៉ា