ភ្នំពេញ៖ កម្លាំងសមត្ថកិច្ចនគរបាលខណ្ឌជ្រោយចង្វា ឃាត់ខ្លួនជនសង្ស័យ៩នាក់ ដកហូតគ្រឿងញៀន ចំនួន៥កញ្ចប់ (តូច៤ ធំ១) កាលពីមម៉ោងជាង៤រសៀលថ្ងៃទី០២ ខែកុម្ភៈ ឆ្នាំ២០១៦ នៅតាមបណ្ដោយផ្លូវជាតិលេខ៦ ទល់មុខវត្តគៀនឃ្លាំង ស្ថិតនៅក្រុមទី៣ ភូមិគៀនឃ្លាំង សង្កាត់-ខណ្ឌជ្រោយចង្វា ។
លោក ឯក សេរីវុធ អធិការងខណ្ឌជ្រោយចង្វាទទួលផែនព្រហ្មទណ្ឌ បានឲ្យដឹងថាជនត្រូវសង្ស័យទាំង៩នាក់រួមមាន ទី១. ឈ្មោះ ណេត លារ៉េត អាយុ២៤ឆ្នាំ មានមុខរបរជាកសិករស្នាក់នៅ ភូមិកំពង់ដំរី ឃុំព្រែកតាម៊ាក់ ស្រុកខ្សាច់កណ្ដាល ខេត្តកណ្ដាល ទី២. ឈ្មោះ លី ឈាងម៉េង អាយុ១៩ឆ្នាំ ជានិស្សិត ស្នាក់នៅ ភូមិបឹងក្រចាប់ជើង ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល ទី៣. ឈ្មោះ ថា វុទ្ធី អាយុ២០ឆ្នាំ មានមុខរបរជាកម្មករសំណង់ ស្នាក់នៅ ភូមិខ្ទរ សង្កាត់ព្រែកលៀប ខណ្ឌជ្រោយចង្វារ ទី៤. ឈ្មោះ ហែម ទូច អាយុ២៦ឆ្នាំ មុខរបរកម្មករសំណង់ ស្នាក់នៅ បន្ទប់ជួល ផ្លូវបេតុង ភូមិគៀនឃ្លាំង សង្កាត់ព្រែកលៀប ខណ្ឌជ្រោយចង្វារ ទី៥. ឈ្មោះ ឆាយ ម៉េងធាន អាយុ២០ឆ្នាំ ស្នាក់នៅមិនពិតប្រាកដ ក្នុងសង្កាត់អូរបែកក្អម ខណ្ឌពោធិ៍សែនជ័យ ទី៦. ឈ្មោះ សោម សុវណ្ណារិទ្ធ អាយុ២៣ឆ្នាំ ជានិស្សិតស្នាក់នៅ ភូមិក្បាលកោះ សង្កាត់កោះដាច់ ខណ្ឌជ្រោយចង្វារ ទី៧. ឈ្មោះ ម៉ិច មករា អាយុ២៤ឆ្នាំ មុខរបរជាងជួសជុលទូរស័ព្ទ ស្នាក់នៅខណ្ឌពោធិ៍សែនជ័យ ទី៨. ឈ្មោះ ហេង បញ្ញា អាយុ១៨ឆ្នាំ មុខរបរជាងឡាន ស្នាក់នៅភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ និងទី៩. ឈ្មោះ យ៉េន លីហ៊ៅ អាយុ២៥ឆ្នាំ មុខរបរកសិករ ស្នាក់នៅ ភូមិក្បាលកោះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ ។
លោកអធិការរងបន្តថា ដោយមានការបញ្ជាពីលោកអធិការនគរបាលខណ្ឌជ្រោយចង្វាបានដាក់គោលដៅត្រួតពិនិត្យចរាចរ និងដើម្បីរក្សាសន្តិសុខសុវត្ថិភាពផ្សេងៗ ក្នុងមូលដ្ឋាន តាមបណ្ដោយផ្លូវជាតិលេខ៦នោះ កម្លាំងរបស់លោក ក៏បានប្រទះឃើញយុវជនជិះម៉ូតូ៤គ្រឿងមានបក្ខពួក៩នាក់ ជិះឆ្លងកាត់។ ពេលនោះ ដោយកម្លាំងសមត្ថកិច្ចមានការសង្ស័យ ក៏បានឃាត់ឆែកឆេររកឃើញថ្នាំក្រាមសថ្លា ជាប្រភេទម៉ាទឹកកកចំនួន៥កញ្ចប់ធំ១ តូច៤ ។
បច្ចុប្បន្នជនសង្ស័យទាំង៩នាក់ កំពុងឃុំខ្លួនបណ្ដោះអាសន្ននៅអធិការដ្ឋាន នគរបាលខណ្ឌជ្រោយចង្វា រួមនឹងវត្ថុតាងដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី ៕
ដោយ៖ ជ្រោយពេជ្រ
