អន្តរជាតិ៖ ប្រទេសនូវែលសេឡង់ ក្រោយមានសភាពស្ងប់ស្ងាត់ករណីឆ្លង COVID-19 ក្នុងសហគមន៍ អស់រយៈពេលជាង៣ខែមកនេះ ។ស្រាប់តែថ្មីៗនេះប្រទេសខ្លួន បានរកឃើញករណីឆ្លងថ្មីជាចង្កោមក្នុងប្រទេស សរុបចំនួន១៧ករណីហើយ ខណៈរដ្ឋាភិបាលកំពុងញាប់ដៃជើងក្នុងការរកប្រភពចម្លងជំងឺ COVID-19 នៅទីក្រុង Auckland ។ ចំណែកឯប្រជាជនក្នុងទីក្រុង Auckland បាននាំគ្នាសម្រុកទៅផ្សារទំនើបដើម្បីទិញសម្ភារប្រើប្រាស់ចាំបាច់ទុក ខណៈរដ្ឋាភិបាលប្រកាសរឹតបន្តឹងជាថ្មីក្នុងទីក្រុងមួយនេះ។
ជាក់ស្តែង នៅថ្ងៃព្រហស្បត្តិ៍ ទី១៣ ខែសីហា ឆ្នាំ២០២០នេះ នាយករដ្ឋមន្ត្រីនូវែលសេឡង់ អ្នកស្រី ចាស៊ីនដា អាឌើន (Jacinda Arden) ក៏បានព្រមានថា ករណីឆ្លងថ្មីទំនងនឹងត្រូវបានរកឃើញបន្ថែមទៀត។
សូមជម្រាបថា នូវែលសេឡង់ អស់រយៈពេល១០២ថ្ងៃមកហើយ ដែលប្រទេសមួយនេះគ្មានករណីឆ្លង COVID-19 ក្នុងសហគមន៍ ប៉ុន្តែស្រាប់តែថ្មីៗនេះ នូវែលសេឡង់ក៏មានការឆ្លងជាចង្កោមថ្មីក្នុងប្រទេសតែម្តង ។ ព្រោះនៅថ្ងៃទី១៣ ខែសីហា នេះ ក្រសួងសុខាភិបាលនូវែលសេឡង់ ប្រកាសពីការរកឃើញករណីឆ្លង១៣នាក់ថ្មីនៅទីក្រុង Auckland បន្ទាប់ពីរកឃើញមួយគ្រួសារបួននាក់ ជាករណីឆ្លង COVID-19 ថ្មីរបស់នូវែលសេឡង់កាលពីពីរថ្ងៃមុន។ ប្រទេសនេះក៏មានករណីឆ្លងនាំចូលពីបរទេសមួយផងដែរ ដែលធ្វើឲ្យករណីឆ្លងបច្ចុប្បន្នមាន៣៦ខណៈករណីឆ្លងសរុបទូទាំងប្រទេសមាន១៥៨៩នាក់។
បើតាមការផ្សាយរបស់ទីភ្នាក់ងារព័ត៌មាន Reuters និយាយថា អ្នកកស្រី នាយករដ្ឋមន្ត្រីនូវែលសេឡង់ ចាស៊ីនដា អាឌើន បញ្ជាក់ក្នុងសន្និសីទសារព័ត៌មានមួយនៅថ្ងៃទី១៣ ខែសីហានេះថា នូវែលសេឡង់កំពុងស្ថិតក្នុងស្ថានភាពយ៉ាប់យ៉ឺន តែវានឹងត្រូវបានដោះស្រាយយ៉ាងប្រញាប់ តាមវិធីសាស្ត្រសមស្រប។ អ្នកស្រី ក៏កត់សម្គាល់ដែរថា ស្ថានភាពនឹងអាក្រក់ មុនប្រែទៅជាល្អនៅពេលក្រោយ ហើយករណីឆ្លងថ្មីទំនងជាត្រូវប្រកាសនៅថ្ងៃខាងមុខទៀត។
អគ្គនាយកសុខាភិបាលនូវែលសេឡង់ Ashley Bloomfield និយាយថា អាជ្ញាធរខិតកាន់តែជិតក្នុងការរកអ្នកជំងឺដំបូងគេបង្អស់។ លោកBloomfield ធ្លាប់និយាយថា វីរុសទំនងចូលនូវែលសេឡង់តាមការទំនិញកកដែលដឹកជញ្ជូនពីក្រៅប្រទេស។ពេលនេះ អាជ្ញាធរនូវែលសេឡង់ កំពុងតាមរកប្រភពចម្លងថ្មីនេះ។ ក្នុងចំណោមករណីឆ្លងថ្មី មានករណីបីធ្វើការនៅកន្លែងស្តុក ដែលជាទីតាំងសមាជិកម្នាក់ក្នុងចំណោមគ្រួសារបួននាក់ឆ្លង COVID-19 មុនគេ ធ្វើការដែរ។
ជាមួយករណីឆ្លងថ្មី ទីក្រុង Auckland ដែលជាទីក្រុងធំជាងគេនៅនូវែលសេឡង់ ត្រូវស្ថិតក្រោមការរឹតត្បិតកម្រិតបី ហើយផ្នែកឯទៀតរបស់ប្រទេសនេះ ស្ថិតក្រោមវិធានការកម្រិតពីរ។ ប្រជាជនទីក្រុងនេះ នាំគ្នាទិញសម្ភារចាំបាច់ផ្សេងទុក ព្រោះប្រជាជនមិនត្រូវបានអនុញ្ញាតឲ្យដើរហើរក្រៅផ្ទះឡើយ បើគ្មានការចាំបាច់អំឡុងពេលការរឹតបន្តឹងនេះ។ ប្រជាជនខ្លះទៀត តម្រង់ជួរទទួលការធ្វើតេស្តរកជំងឺ COVID-19 ផងដែរ៕ដោយ៖ស តារា
