លោក ប៉ា សុជាតិវង្ស៖ ការអប់រំទាំងក្នុង និងក្រៅប្រព័ន្ធត្រូវដើរទន្ទឹមគ្នា ដើម្បីឲ្យពួកគេបានចូលរៀនគ្រប់ៗគ្នា ប្រកបដោយសមធម៌ និងគុណភាព

ចែករំលែក៖

ភ្នំពេញ៖ លោកប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា៖ ការអប់រំទាំងក្នុង និងក្រៅប្រព័ន្ធត្រូវដើរទន្ទឹមគ្នា ដោយសហការយ៉ាងជិតស្និទ្ធជាមួយ និងភាគីពាក់ព័ន្ធទាំងអស់ដើម្បីបំផុសអាណាព្យាបាលឲ្យកុមារដល់អាយុក្នុងវ័យសិក្សា ឬហួសវ័យសិក្សា និងសិស្សដែលបានបោះបង់ការសិក្សា និងយុវជន នៅក្រៅសាលារៀន ដោយសារតែបញ្ហាអាយុ ឬលក្ខខណ្ឌជីវភាពគ្រួសារក្រីក្រនោះ ត្រូវឲ្យពួកគេបានចូលរៀនគ្រប់ៗគ្នាប្រកបដោយសមធម៌ គុណភាព និងប្រកបដោយភាពសុខដុមរមនានៅសហគមន៍។

លោកប៉ា សុជាតិវង្ស បានថ្លែងបែបនេះ នៅក្នុងពិធីបិទសន្និបាតបូកសរុបវាយតម្លៃការងារអប់រំយុវជននិងកីឡារាជធានីភ្នំពេញ ឆ្នាំសិក្សា២០១៥-២០១៦នៅមន្ទីរអប់រំយុវជននិងកីឡា កាលពីរសៀលថ្ងៃទី៣ ខែកុម្ភៈឆ្នាំ២០១៦។

លោកប៉ា សុជាតិវង្ស បានបញ្ជាក់ថា៖ តាមរយៈអង្គសន្និបាតក៍បានបង្ហាញពីការ ឆ្លុះបញ្ចាំងឲ្យឃើញនូវការយកចិត្តទុកដាក់ខ្ពស់របស់ក្រសួងអប់រំ យុវជននិងកីឡា ជាមួយនឹងសាលារាជធានីភ្នំពេញ ក្នុងការអភិវឌ្ឍវិស័យអប់រំ យុវជននិងកីឡា ស្របពេលដែលវិស័យនេះ កំពុងស្ថិតនៅក្នុងដំណាក់កាល នៃការធ្វើកំណែទម្រង់ស៊ីជម្រៅ ដែលអាចនិយាយបានថា ជារបត់មួយថ្មីក្នុងវិស័យស៊ីវីល័យ ដែលតម្រូវឲ្យមានការផ្លាស់ប្តូរ បរិបទការបង្រៀន ការផ្ទេរចំណេះដឹង ការចែករំលែកបទពិសោធន៍ របៀបនៃការរៀនសូត្រ និងការទទួលយកនូវចំណេះដឹងបំនិនជីវិតព្រមទាំងបទពិសោធន៍ត្រូវផ្ទេរទៅអ្នកជំនាន់ក្រោយដោយស្វ័យប្រវត្ដិ។

លោកបានបន្តថា៖ ផ្អែកតាមអនុសាសន៍សម្តេចតេជោនាយករដ្ឋមន្ត្រី ជាផ្នែកមួយដ៏សំខាន់ ក្នុងការផ្តល់ឱកាស និងបង្កលក្ខណៈឲ្យកុមារ ពិសេសកុមារី និងយុវជន បានចូលរៀនគ្រប់ៗគ្នា ក្នុងនោះរាជរដ្ឋាភិបាល បានកំណត់ថា នឹងបញ្ចប់លែងឲ្យមានអនក្ខរជន ឬបញ្ចប់ការអប់រំសម្រាប់ទាំងអស់គ្នា ក្នុងឆ្នាំ២០១៦នេះ។ អាទិភាពភាវូបនីយកម្មនៃការអភិវឌ្ឍប្រទេសទាំងពេលបច្ចុប្បន្ន និងទៅអនាគត ត្រូវបានរាជរដ្ឋាភិបាលកម្ពុជា បានទទួលស្គាល់នូវតួនាទីក៏សំខាន់របស់វិស័យអប់រំ យុវជន និងកីឡា ក្នុងការកសាងធនធានមនុស្សប្រកបដោយគុណភាព ដើម្បីឆ្លើយតបទៅនឹងតម្រូវការទីផ្សារពលកម្មផង និងដើម្បីជំរុញឲ្យមានការផ្លាស់ប្តូរនៃរចនាសម្ព័ន្ធសេដ្ឋកិច្ច សង្គម និងវប្បធម៌ តាមរយៈកម្មវិធីកំណែទម្រង់ស៊ីជម្រៅ ក្នុងបរិបទនៃទំនើបកម្មក្នុងវិស័យបច្ចេកវិទ្យា ឈរលើមូលដ្ឋាននៃចំណេះដឹង។ គុណភាពនៃការអប់រំ គឺជាគន្លឹះសម្រាប់ដោះស្រាយ រាល់បញ្ហាប្រឈមនានា ទាំងក្នុងអភិបាលកិច្ច ការអភិវឌ្ឍសេដ្ឋកិច្ច និងសង្គម ក៏ដូចជាការអភិវឌ្ឍសហគមន៍ និងក្រុមគ្រួសារ ហើយសហគមន៍ គ្រួសារ សាលារៀន គឺជាតួអង្គដ៏សំខាន់មួយ ក្នុងចំណោមតួអង្គស្នូលនានា នៅក្នុងការកសាងមូនធនមនុស្ស ក្នុងក្របខ័ណ្ឌរាជធានីភ្នំពេញ ។ សាលារាជធានីភ្នំពេញ បាននិងកំពុងយកចិត្តទុកដាក់ខ្ពស់ទៅលើវិស័យអប់រំ ដែលជាវិស័យអាទិភាពមួយដ៏សំខាន់ ដោយហេតុថា វិស័យនេះ គឺជាឆ្អឹងខ្នងសម្រាប់ទ្រទ្រង់ការអភិវឌ្ឍសេដ្ឋកិច្ចជាតិ ព្រមទាំងការអភិវឌ្ឍវិស័យដទៃៗទៀត ក្នុងនោះផ្អែកតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ បានកំណត់នូវធាតុ ៤ ក្នុងការអភិវឌ្ឍ សេដ្ឋកិច្ចជាតិនោះគឺ ទឹក ផ្លូវ ភ្លើង ធនធានមនុស្ស ។ ការផ្សារភ្ជាប់សាលារៀន ទៅនឹងគ្រួសារ និងសង្គម ដើម្បីធានាកាត់បន្ថយថែមទៀតនូវអត្រារៀនត្រួតថ្នាក់ និងអត្រាបោះបង់ការសិក្សា មានន័យថា យើងត្រូវពង្រឹងគុណភាពអប់រំតាមរយៈការអនុវត្តយុទ្ធសាស្ត្រមុំបី សហគមន៍-គ្រួសារ-សាលារៀន សំដៅអប់រំកូនចៅឲ្យទៅជា កូនល្អ មិត្តល្អ សិស្សល្អអនាគតពលរដ្ឋល្អ។

លោកស្រីហួត យ៉ារី ប្រធានមន្ទីរអប់រំយុវជន និងកីឡារាជធានីភ្នំពេញ បានបញ្ជាក់ថា៖ លទ្ធផលនៃអង្គសន្និបាតដែលសម្រេចបាន ជាវិធានការសម្រាប់អនុវត្តនៅឆ្នាំខាងមុខ ក្នុងគោលបំណងលើកកម្ពស់គុណភាព ប្រសិទ្ធភាពនិងសមធម៌ នៃការអប់រំ ។ ដើម្បីសម្រេចបានលទ្ធផលទាំងនេះបានជោគជ័យត្រូវបន្តសហការជាមួយ អាជ្ញាធរមូលដ្ឋានគ្រប់លំដាប់ថ្នាក់ មន្ទីរជំនាញពាក់ព័ន្ធ ដៃគូអភិវឌ្ឍន៍ជាតិ អន្តរជាតិ សប្បុរសជនក្នុងនិងក្រៅប្រទេសជួយឧបត្ថម្ភគាំទ្រ។

លោកស្រីបន្តថា៖ សម្រាប់ឆ្នំាសិក្សាកន្លងមកនេះ មន្ទីអប់រំ បានចុះធ្វើការណែនំា ដល់គ្រប់គ្រឹះស្ថានអប់រំទំាងអស់ត្រូវបន្ដពង្រឹងគុណភាពបង្កើនសមត្ថភាពស្របតាមផែនការយុទ្ធសាស្រ្ដវិស័យអប់រំ(ESP២០១៥_២០១៨) ក៍ដូចជាយុទ្ធសាស្រ្ដចតុកោណដំណាក់កាលទី៣របស់រាជរដ្ឋាភិបាល ជាពិសេសស្របទៅតាមកម្មវិធីកំណែ និងត្រូវចេះធ្វើការប្រៀបធៀបនូវសមិទ្ធផលអប់រំដែលអង្គភាពរបស់ខ្លួនជាមួយនិងអង្គភាព ដៃគូដទៃស្របតាមទិសស្លោកថា មានកំណែទម្រង់មានការអភិវឌ្ឍ គ្មានកំណែទម្រង់គ្មានការីកចម្រើន ៕

image (1)