ភ្នំពេញ៖ ការប្រកួតប្រដាល់ជើងឯកTIFFY SUPER FIGHTនាល្ងាចថ្ងៃអាទិត្យទី៧ខែកុម្ភៈឆ្នាំ២០១៦បានឈានដល់វគ្គជម្រុះដំណាក់កាលទី២ដណ្តើមយកកៅអី ឡើងទៅប្រកួតដំណាក់កាលទី៣វគ្គ១\៤ និង១\២ផ្តាច់ព្រ័ត្រ ដើម្បីឆ្ពោះទៅដណ្តើមពានរង្វាន់ជើងឯក TIFFY SUPER FIGHT ទម្ងន់៥៧នៅលើសង្វៀនទូរទស្សន៍ប៉ុស្តិ៍លេខ៥អារីណា ។
ការប្រកួតវគ្គជម្រុះដំណាក់កាលទី២សប្តាហ៍ទី១តម្រូវលើកីឡាករ ពេជ្រ ម្ទេសខ្មាំង អ្នកប្រដាល់ក្លិបអារុណរះកីឡាប្រកួតជាមួយ កីឡាករ គុណ សំណង មកពីក្លិបគីសែមានរិទ្ធ រីឯ កីឡាករ ចាត សីហាមកពីក្លិបអប់រំកាយកីឡាខេត្តឧត្តរមានជ័យជួបជាមួយ បឺត សង្ឃឹម របស់ក្លិបរ៉ាហាបស្វាយប៉ាក ក្នុងការប្រកួត ដំណាក់ទី២នេះ មានរយៈពេលត្រឹមតែ៣ទឹកប៉ុណ្ណោះ។
ជំនួបរវាងពេជ្រ ម្ទេសខ្មាំង និង គុណ សំណង គឺអ្នកឈ្នះដំណាក់ទី១ដូចគ្នា ដោយម្ទេសខ្មាំងវាយឈ្នះកីឡាករគឿន សុខហេង មកពីក្លិបមកុដរាជសីហ៍ក្នុងទឹកទី២ខណៈដែលគុណ សំណងក៏វាយឈ្នះសុខ ទូ របស់ក្លិបឃ្លាំងមឿងកីឡាឲ្យបោះបង់កាប្រកួតក្នុងទឹកទី២ដែរ។ទោះបីយ៉ាងក៏ អ្នកបរដាល់ទាំង២នាក់បានសំងំហ្វឹកហាត់អស់១ខែកន្លះហើយដែរ ដើម្បីវាយដណ្តើមយកកៅអីជុំទី៣ ។តើពេជ្រ ម្ទេសខ្មាំង ឬក៏គុណ សំណង ជាអ្នកទទួលបានគៅអីវគ្គ៨ចុងក្រោយសម្រាប់ TIFFY SUPER FIGHT ទម្ងន់៥៧ ? ។
ដោយឡែកជំនួបរវាងកីឡាករ ចាត សីហា និង បឺត សង្ឃឹមវិញវគ្គ១៦នាក់នេះក៏មានលក្ខណៈតឹងតែង ខ្លាំងណាស់ដែរ ។ តាមតួលេខប្រកួតដំណាក់កាលទី១ ចាត សីហា វាយឈ្នះកីឡាករ គួន ប៊ុនហ៊ីម របស់ពីក្លិបពន្លឺសាមគ្គីខេត្តសៀមរាបដោយពិន្ទុ រីឯ បឺត សង្ឃឹម វាយឈ្នះម៉ន រ៉ៃយ៉ា មកពីក្លិបការិយា ល័យទី៥ដោយពិន្ទុដូចគ្នា។ ប៉ុន្តែកីឡាករទាំង២នាក់មានចំណុចពិសេសដូចម្យ៉ាងម្នាក់ ដូច្នេះកៅអីវគ្គ៨ នាក់ចុងក្រោយពុំទាន់ប្រាកដថា ធ្លាក់ទៅក្នុងដៃ ចាត សីហា ឬក៏ បឺត សង្ឃឹម នោះឡើយ។
អ្នកប្រដាល់ទាំង១៦នាក់ដែលត្រូវឡើងប្រកួតជម្រុះដំណាក់កាលទី២រួមមាន កីឡាករ ពេជ្រ ម្ទេសខ្មាំងក្លិបអារុណរះកីឡា , គុណ សំណង ក្លិបគីសែមានរិទ្ធ , ចាត សីហាក្លិបអប់រំកាយកីឡាខេត្តឧត្តរមានជ័យ , បឺត សង្ឃឹម ក្លិបរ៉ាហាបស្វាយប៉ាក , គង់ ហ៊ូវ ក្លិបកងពលធំអន្តរាគមន៍លេខ២ , យិន បូរិន ក្លិបអាស៊ីកីឡា , ឡាញ់ ផល្លាក្លិបអេភូថងកីឡា , ម៉ឺន ដា ក្លិបខ្លារខិនមានរិទ្ធ , សេន កុសល ក្លិបមោងឬស្សីមរតកគុនខ្មែរ, ថន វាសនាក្លិបនាគរាជមានជ័យ , ចាន់ គង់រាជ ក្លិបតាព្រហ្មមានជ័យ , ឆាយ ម៉េត ក្លិបសំរោងកោងខេត្តបាត់ដំបង , ឡូញ វ៉ាន់ឌី ក្លិបពន្លឺវិបុលរិទ្ធី , រស់ វិបុល ក្លិបសាលវ័ន្តកីឡា , អ៊ី វ៉ាន់ស័ក្ត ក្លិបរស្មីភូមិគាបខេត្តបន្ទាយមានជ័យ និង ផាន ផាត់យុទ្ធ ក្លិបសាលវ័ន្តកីឡា
ក្រៅពីគូវាយដណ្តើមពានរង្វាន់ TIFFY SUPER FIGHT ក៏នៅមានជំនួបប្រកួតរវាងកីឡាករឈាន រស្មី មកពីក្លិបរាជសីហ៍ខេត្តរតនគិរីសងសឹកជ័យ វណ្ណៈមកពីក្លិបឃ្លាំងមឿងកីឡា ក្នុងប្រភេទទម្ងន់៦០គីឡូក្រាម ។ កាលពីជួបប្រកួតគ្នាលើកមុន រស្មី វាយចាញ់ វណ្ណៈ ត្រឹមតែពិន្ទុប៉ុណ្ណោះ ៕
ដោយ៖ សារីម
