ប្រេស៊ីលប្រកាសសង្គ្រាមជាមួយវីរុស Zika ដែលឆ្លងតាមរយៈសត្វមូស

ចែករំលែក៖

រដ្ឋាភិបាលប្រទេសប្រេស៊ីលបានប្រកាសតាមកញ្ចក់ទូរទស្សន៍កាលពីថ្ងៃទី៤ ខែកុម្ភៈ ឆ្នាំ២០១៦ ធ្វើសង្គ្រាមប្រឆាំងជាមួយវីរុសហ្សីកា (Zika) ដែលឆ្លងតាមរយៈសត្វមូស ខណៈដែលវីរុសនេះឆ្លងរាលដាលស្ទើរនៅទូទាំងប្រទេសនោះ ។

_88091770_88091769

លោកស្រី Dilma Rousseff ប្រធានាធិបតីប្រេស៊ីលបានថ្លែងថា នៅថ្ងៃទី៥ ខែកុម្ភៈ ឆ្នាំ២០១៦ មានការចល័តកងទ័ពរាប់ពាន់នាក់ បុគ្គលិករដ្ឋការ និងបុគ្គលិកឯកជនផងដែរនៅទូទាំងប្រទេសដើម្បីលុបបំបាត់ឲ្យទីជម្រករបស់សត្វមូសដែលភាគច្រើនជ្រកពូននៅក្បែរលំនៅឋាន និងការិយាល័យផងដែរនោះ ។

វីរុសហ្សីកា ត្រូវក្រុមវេជ្ជបណ្ឌិតលើកឡើងថា មានសមត្ថភាពធ្វើឲ្យខួរក្បាលទារកនៅក្នុងផ្ទៃមាតា ពុំមានការលូតលាស់ ហើយក្បាលទារកនោះនឹងតូចខុសប្លែកពីធម្មតា នៅពេលប្រសូត្រចេញពីផ្ទៃនៃមាតា ។

អង្គការសុខភាពពិភពលោកបានប្រកាសអាសន្នពាក់ព័ន្ធវីរុសហ្សីកានេះ ហើយអំពាវនាវឲ្យពិភពលោកចូលរួមទប់ស្កាត់ និងប្រុងប្រយ័ត្ន ។ វីរុសនេះកំពុងរាលដាលខ្លាំងនៅអាមេរិក ។

មន្ត្រីសុខាភិបាលអាមេរិក និងអង្គការសហប្រជាជាតិបានស្តីបន្ទោសប្រទេសប្រេស៊ីលថា មិនបានចែករំលែកព័ត៌មាន ក៏ដូចវិធីសាស្ត្រក្នុងការទប់ស្កាត់បានទាន់វេលាចំពោះវីរុសនេះ ទើបជាមូលហេតុធ្វើឲ្យទារកមានក្បាលតូចកាន់តែច្រើនឡើង ។

អង្គការសុខភាពពិភពលោកបានអះអាងថា វីរុសហ្សីកានេះបាននិងកំពុងឆ្លងរាលដាលប្រទេស២៤ក្នុងពិភពលោក ។ មិនទាន់រកឃើញវាក់សាំងសម្រាប់បង្កាវីរុសនេះឡើយសម្រាប់អង្គការសុខភាពពិភពលោក ប៉ុន្តែទោះបីយ៉ាងណា ឥណ្ឌា បានប្រកាសថា ខ្លួនបានរកឃើញវាក់សាំងបង្កាវីរុសហ្សីកានេះហើយ ។

ក្រុមហ៊ុនផលិតឱសថមួយនៅឥណ្ឌាមានឈ្មោះ Bharat Biotech បានប្រកាសថា ខ្លួនបានអភិវឌ្ឍវ៉ាក់សាំងសម្រាប់ការពារមេរោគដ៏សាហាវ “Zika” បានមុនគេលើលោក។ បច្ចុប្បន្នវ៉ាក់សាំងនេះកំពុងស្ថិតក្រោមការពិសោធន៍ជាមួយសត្វនៅឡើយ ហើយក្រុមហ៊ុននេះកំពុងស្វែងរកការគាំទ្រផ្នែកហិរញ្ញវត្ថុពីរដ្ឋាភិបាលឥណ្ឌាដើម្បីពន្លឿនការពិសោធន៍និងឈានទៅផលិតចេញជាផ្លូវការផង។

លោក Krishna Ella ប្រធានក្រុមហ៊ុនខាងលើនេះ បានអះអាងថា ក្រុមហ៊ុនលោកជាស្ថាប័នឱសថដំបូងគេលើលោកដែលសុំប៉ាតង់សម្រាប់វ៉ាក់សាំងនេះ។ តែលោកបញ្ជាក់ថា ការពិសោធន៍វ៉ាក់សាំងចំពោះសត្វនិងមនុស្សត្រូវចំណាយពេលវេលាយូរ ។ ដូច្នេះហើយលោកបានស្នើសុំឲ្យស្ថាប័នពាក់ព័ន្ធជាពិសេសរដ្ឋាភិបាលឥណ្ឌាដើម្បី សម្រួលដល់ដំណើរការស្រាវជ្រាវ និង ឈានទៅផលិតវ៉ាក់សាំងសម្រាប់ជួយប្រទេសដែលរងគ្រោះទៀត៕

_88091728_88091727