អន្តរជាតិ៖ ក្រោយពីមានភាពចលាចលនយោបាយអស់រយៈពេលជាច្រើនខែនៅក្នុងប្រទេសម៉ាលីនោះ ក្រុមពួកទាហានបះបោរ ក៏បានចាប់ខ្លួនប្រធានាធិបតីប្រទេសម៉ាលីលោក Boubacar Keita ហើយនោះ ។ លោកប្រធានាធិបតី ក៏សម្រេចលាចេញពីតំណែង កាលពីយប់ថ្ងៃអង្គារសប្ដាហ៍នេះ ក្នុងពេលប៉ុន្មានម៉ោងក្រោយមកពេលចាប់ខ្លួន ។
លោក ប្រធានាធិបតីប្រទេសម៉ាលី ដែលពាក់ម៉ាស់ការពារវីរុសកូរ៉ូណានិងហាក់ដូចជាគ្មានកម្លាំង បានបង្ហាញខ្លួននៅទូរទស្សន៍រដ្ឋ ដោយប្រកាសថា៖ លោកបានចុះចេញពីតំណែងដើម្បីបញ្ចៀសការបង្ហូរឈាម។ ការថ្លែងលាលែងពីតំណែងនេះ បានធ្វើឡើងកាលពីថ្ងៃទី១៨ខែសីហា ឆ្នាំ២០២០ថ្មីៗនេះ ។
លោក Keita មានអាយុ ៧៥ ឆ្នាំ លោកបាននិយាយថា ប្រសិនបើ «ពួកយោធាខ្លះ» ចង់បញ្ចប់តំណែងប្រធានាធិបតីរបស់លោក «ដោយការធ្វើអន្តរាគមន៍របស់ពួកគេ» គឺលោក «គ្មានជម្រើសទេ»។ លោក Keita ក៏បានប្រកាសផងដែរថា រដ្ឋាភិបាលរបស់លោកនិងរដ្ឋសភានឹងត្រូវរំលាយ។
សូមជម្រាបថា នៅក្នុងសុន្ទរកថាលាចេញពីតំណែងរបស់លោក Keita បានបញ្ចប់ភាពចលាចលរយៈពេលមួយថ្ងៃនៅពេលដែលពួកទាហានបានរឹបអូសយកកាំភ្លើងពីបន្ទាយយោធានៅក្នុងទីក្រុង Kati ហើយបានសម្រុកចូលរដ្ឋធានីបាម៉ាកូ។
ដោយឡែកអ្នកយកព័ត៌មានម្នាក់នៅក្នុងប្រទេសម៉ាលី ក៏បានប្រាប់សេវាផ្សាយជាភាសាបារាំងរបស់ VOA ថា៖ ពួកទាហាន «បានសម្រុកទាំងកម្រោលទៅឃ្លាំងអាវុធ រួចយកកាំភ្លើង ហើយបានចាប់ផ្តើមបាញ់ទៅលើអាកាស និងចេញមកក្រៅ ហើយកាត់ផ្តាច់ការចេញចូលក្នុងបន្ទាយទាហាននោះ»។
បន្ទាប់មកក្រុមពួកបាតុករប្រឆាំងរដ្ឋាភិបាលមួយចំនួនបានប្រមូលផ្តុំគ្នានៅទីលានកណ្តាលរដ្ឋធានីបាម៉ាកូស្រែកហ៊ោអបអរពួកទាហាននៅពេលដែលពួកគេដើរចូលផ្ទះលោក Keita ដើម្បីចាប់ខ្លួនលោក។
គួរបញ្ជាក់ថា ពួកទាហានបានចាប់ខ្លួនលោកប្រធានាធិបតី Keita និងលោកនាយករដ្ឋមន្ត្រី Boubou Cisse នៅឯគេហដ្ឋានរបស់លោកKeita ហើយបានបញ្ជូនពួកគេទៅកាន់ទីក្រុង Kati ជាកន្លែងដូចគ្នាដែលនៅទីនោះ រដ្ឋប្រហារទម្លាក់លោកប្រធានាធិបតី Tomani Toure កាលពីឆ្នាំ ២០១២ បានចាប់ផ្តើម៕ដោយ៖ស តារា
