វៀតណាម៖ នៅព្រឹកថ្ងៃទី២២ខែសីហា គណកម្មការខេត្ត វ៉ាងងាយ (Quang Ngay) បានប្រើប្រាស់រថយន្តក្រុង ដល់ទៅ២៩គ្រឿង សម្រាប់ដឹកពលរដ្ឋ៧៣០នាក់ជាប់គាំងនៅ ទីក្រុងដាណាងវិលត្រឡប់ទៅស្រុកវិញ។ នៅពេលទៅដល់ខេត្តវ៉ាងងាយ នឹងត្រូវធ្វើចត្តាឡីស័ក១៤ថ្ងៃ។
តាមបញ្ជីចុះឈ្មោះ មានពលរដ្ឋប្រមាណ៧៣០នាក់នៅខេត្តវ៉ាងងាយ ភាគច្រើនជា សិស្ស និស្សិត ទៅកម្សាន្តនៅទីក្រុងដាណាងមុនពេល កូវីដ-១៩ផ្ទុះឡើង។ មន្ត្រីខេត្តទាំងពីរបានសហការគ្នា បញ្ជូនពលរដ្ឋដែលជាប់គាំចេញពីទីក្រុងដាណាង ។
ពលរដ្ឋដែលត្រូវវិលត្រឡប់ទៅស្រុកកំណើតរបស់ខ្លួនវិញ គឺត្រូវឡើងរថយន្តនៅទីលាន២៩ខែមីនា មហាវិថី២កញ្ញា ខណ្ឌ ហាយចូវ ទីក្រុងដាណាង។ មុនពេលឡើងរថយន្តគឺត្រូវតែបង្ហាញលិខិតបញ្ជាក់សុខភាពដល់មន្ត្រីទទួលខុសត្រូវ។
ដើម្បីធានាសុវត្ថិភាពនិងទប់ស្កាត់ការឆ្លង រថយន្តក្រុងនីមួយៗដឹកមនុស្សបានពី២៥-៣០នាក់តែប៉ុណ្ណោះ ។
នៅរសៀលថ្ងៃទី២២ខែសីហានេះពលរដ្ឋទាំង៧៣០នាក់នឹងទៅដល់ខេត្តវ៉ាងងាយ ដែលជាទីកន្លែងរស់នៅរបស់ខ្លួន។
នៅក្នុងខេត្តដាណាង មានមនុស្ស ៣៦៩នាក់ឆ្លងកូវីដ-១៩ក្នុងនោះមាន២១នាក់ស្លាប់ និង៩៨នាក់ព្យាបាលជាសះស្បើយ ។
ចំណែកនៅទូទាំងប្រទេសវិញមានករណីឆ្លងកូវីដ-១៩សរុប ១០០៩នាក់ ស្លាប់២៥នាក់និងព្យាបាលជាសះស្បើយ៥៤៥នាក់៕ដោយ៖ ធី រីណា
