អន្តរជាតិ៖ ខណៈដែលចិន បានធ្វើសមយុទ្ធយោធានៅក្បែរប្រជុំកោះParacel ដែលវៀតណាមឲ្យឈ្មោះថា Hoang Sa ចាប់ពីថ្ងៃទី២៤ខែសីហាមក ហើយនិងគ្រោងបញ្ចប់នៅថ្ងៃទី២៩ខែសីហាប៉ុន្មានថ្ងៃខាងមុខនេះ ។ ក្រសួងការបរទេសវៀតណាម កាលពីថ្ងៃទី២៦ ខែសីហាឆ្នាំ២០២០ បានស្នើឲ្យរដ្ឋាភិបាលចិន លុបចោលសមយុទ្ធយោធានៅក្បែរប្រជុំកោះមួយនេះ។
បើតាមការអះអាងរបស់ទីក្រុងហាណូយ សមយុទ្ធយោធារបស់ចិន បានបំពានដែនអធិបតេយ្យរបស់វៀតណាម។ ដោយសមយុទ្ធយោធារបស់ចិននៅក្នុងសមុទ្រចិនខាងត្បូង គឺបានប្រព្រឹត្តឡើងហើយនៅក្បែរប្រជុំកោះParacel ប៉ុន្តែវៀតណាម ដែលជាភាគីមួយទាមទារប្រជុំកោះស្ថិតនៅក្នុងសមុទ្រចិនខាងត្បូងនេះ មិនសុខចិត្តឡើយ និងទាមទារឲ្យចិនលុបចោលសមយុទ្ធយោធា។
ចំណែកអ្នកនាំពាក្យក្រសួងការបរទេសវៀតណាម លោកស្រី Le Thi Thu Hang បានអះអាងប្រាប់សារព័ត៌មានក្នុងស្រុកវៀតណាមVietnam Express ថា៖ ការធ្វើសមយុទ្ធយោធានៅក្នុងតំបន់ប្រជុំកោះ Paracel គឺជាការបំពានស្មារតីនៃសេចក្តីប្រកាសស្តីពីការប្រតិបត្តិរបស់ភាគីនៅក្នុងសមុទ្រចិនខាងត្បូង (DOC) និងមិនគោរពតាមការចរចា ដែលពាក់ព័ន្ធនឹងក្រមប្រតិបត្តិសមុទ្រចិនខាងត្បូង (COC) ក៏ដូចជាការរក្សាសន្តិភាព ស្ថិរភាព និងសហប្រតិបត្តិការនៅក្នុងតំបន់។
គួរបញ្ជាក់ថា ដោយមើលឃើញថា សមយុទ្ធយោធាចិនជាការបំពានអធិបតេយ្យរបស់ខ្លួន វៀតណាម បានស្នើឲ្យចិន លុបចោលសមយុទ្ធយោធា និងមិនត្រូវឲ្យកើតមានការបំពានស្រដៀងនេះទៀតទេ។ វៀតណាម បានចាត់ទុកសមយុទ្ធរបស់ចិន គឺខុសច្បាប់។ កន្លងទៅវៀតណាម បានដាក់ការតវ៉ាជាមួយចិនម្តងហើយ ជុំវិញសមយុទ្ធយោធា នៅក្បែរប្រជុំកោះ Spratly កាលពីដើមខែសីហាកន្លងទៅ។
បើតាមការចុះផ្សាយរបស់សារព័ត៌មាន BBC បច្ចុប្បន្នប្រទេសវៀតណាម បានហៅសមុទ្រចិនខាងត្បូងថា សមុទ្រខាងកើត។ ព្រោះនៅក្នុងឆ្នាំ១៩៧៤ ចិន បានដណ្តើមកាន់កាប់ប្រជុំកោះParacel ពីវៀតណាម តាមរយៈការប្រើប្រាស់កម្លាំងយោធា។ ហើយក្នុងការប៉ះទង្គិចគ្នានោះដែរ កងទ័ពវៀតណាមយ៉ាងហោចណាស់ ៧០នាក់ បានបាត់បង់ជីវិត៕ដោយ៖ស តារា
