រដ្ឋមន្រ្តីហិរញ្ញវត្ថុថៃ បន្ទាប់ពីឡើងកាន់តំណែងបាន២៦ថ្ងៃ បានសម្រេចលាលែងពីតំណែង

ចែករំលែក៖

អន្តរជាតិ៖ លោក Predee Daochai រដ្ឋមន្រ្តីហិរញ្ញវត្ថុថៃ ដោយលើកហេតុផលពាក់ព័ន្ធអំពីបញ្ហាសុខភាពរបស់ខ្លួន ក៏បានសម្រេចចិត្តលាលែងពីតំណែងរបស់លោក ក្រោយកាន់កាប់បានត្រឹមតែរយៈពេល២៦ថ្ងៃប៉ុណ្ណោះ។ ប៉ុន្តែមុនដាក់ពាក្យលាលែងនេះ លោក Predee ត្រូវបានរាយការណ៍ថា ខ្វែងគំនិតគ្នាជាមួយអនុរដ្ឋមន្រ្តីហិរញ្ញវត្ថុ Santi Promphat មកពីបក្សកម្លាំងប្រជារាស្រ្ត ទាក់ទងការតែងតាំងមន្រ្តីសំខាន់ៗរបស់ក្រសួង ពិសេសតំណែងអគ្គនាយកគយ។

ក្នុងការប្រកាសដោយរដ្ឋាភិបាលថៃ លោក Predee Daochai បានដាក់ពាក្យលាលែងជារដ្ឋមន្រ្តីហិរញ្ញវត្ថុឲ្យនាយករដ្ឋមន្រ្តី ប្រាយុទ្ធ ចន្ទអូចា នៅថ្ងៃទី៣១ ខែសីហា ហើយការលាលែងនេះ មានប្រសិទ្ធភាពនៅថ្ងៃទី២ ខែកញ្ញានេះ។

សូមជម្រាបថា លោក Predee Daochai ត្រូវបានមហាក្សត្រថៃ តែងតាំងជារដ្ឋមន្ត្រីហិរញ្ញវត្ថុ កាលពីថ្ងៃទី៦ ខែសីហាកន្លងទៅនេះ ។

បើតាមការផ្សាយរបស់កាសែតបាងកកប៉ុស្តិ៍ ដែលដកស្រង់សម្តីលោក Predee បានអះអាងថា ដោយសារតែសុខភាពមិនល្អរបស់លោកទើបលោកសុំលាលែងពីតំណែង ខណៈនាយករដ្ឋមន្រ្តីថៃលោក ប្រាយុទ្ធ ក៏បានបញ្ចុះបញ្ចូលឲ្យលោកបន្តដឹកនាំទៀតផងដែរ ។

កាសែតបាងកកប៉ុស្តិ៍ បន្តថា លោក Predee ចង់ឲ្យនាយកការិយាល័យគោលនយោបាយសារពើពន្ធលោក Lavaron Sangsnit ដឹកនាំអគ្គនាយកដ្ឋានគយ តែលោក Santi ស្នើលោក Prapas Kong-Ied ដែលជានាយកការិយាល័យគោលនយោបាយសហគ្រាសរដ្ឋ ជាបេក្ខជនវិញ។ បញ្ហា ក៏កើតឡើងពេលប្រជុំគណៈរដ្ឋមន្រ្តីចល័តនៅខេត្ត Rayong នៅថ្ងៃទី២៥ ខែសីហាថ្មីៗនេះ ដែលកាលនោះ ឈ្មោះលោក Prapas ត្រូវបានប្រកាសជាបេក្ខជនសម្រាប់តំណែងខាងលើ ហើយលោក Predee ក៏តវ៉ា។

គួរបញ្ជាក់ថា ការសម្រេចចិត្តលើតំណែងអគ្គនាយកគយ ក៏ត្រូវបានផ្អាកសិន ហើយបន្ទាប់មកទៀត គណៈរដ្ឋមន្រ្តីថៃក៏អនុម័តបេក្ខភាពលោកLavaron ទៅ។ ប៉ុន្តែទោះជាយ៉ាងណា លោក Predee ដែលជាអតីតប្រធានធនាគាររដ្ឋកសិករ ក៏នៅតែលាលែងដដែល ដែលទំនងជាមិនពេញចិត្តនឹងអ្វីដែលឡើង។