យ៉ាងហោចណាស់ក៏មានមនុស្ស​៣នាក់ស្លាប់និង​៣៦នាក់រងរបួស រាប់រយនាក់កំពុងតែជាប់គាំងនៅក្រោមគំនរអាគារបាក់បែកនៅឡើយ។
ក្នុងហេតុការណ៍រញ្ជួយដី គម្រិត 6,7 រិចទ័រ លើកោះតៃវ៉ាន់នៅវេលាម៉ោង 3​និង ៥៧នាទី យប់ឈានចូលថ្ងៃទី​៦ខែកុម្ភៈ។
មជ្ឈមណ្ឌុលត្រួតពិនិត្យពីការរញ្ជួយដី​CENC បានប្រកាសឲ្យដឹងថា រញ្ជួយដីមានគម្រិត​6,7 រិចទ័រ ក្នុងជម្រៅ​១៥គីឡូម៉ែត្រនៅក្រោមដី។ ការរញ្ជួយដីនោះបានធ្វើឲ្យអាគារកំពស​់១៦ជាន់បាក់ស្រុត ក្នុងពេលដែលពលរដ្ឋកំពុងតែដែកលង់លក់យ៉ាងស្កប់ស្កល់។ ការបាក់ស្រុតនោះបណ្តាលឲ្យមនុស្ស ជាច្រើនជាប់គាំងនៅក្រោមគំនរបាក់បែក។ នៅព្រឹកថ្ងៃទី​៦ខែកុម្ភៈ ជនរងគ្រោះ៣៤នាក់ត្រូវបានជួយសង្គ្រោះចេញពីអាគារដួលរលំ ហើយនៅមានមនុស្សរាប់រយនាក់ទៀតជាប់នៅខាងក្នុងនៅឡើយ។
ក្រុមជួយសង្គ្រោះបានខិតខំអស់ពីសមត្ថភាពដោយបានប្រើប្រាស់នៅគ្រឿងយន្តក្នុងការគាស់កកាយស្វែងរកអ្នកជាប់នៅខាងក្នុងឲ្យបានទាន់ពេល។
​សារព័ត៌មាន​AP បានផ្សាយថា មកទល់វេលាម៉ោង​៩ព្រឹក ថ្ងៃទី​៦ មានជនរងគ្រោះដល់ទៅ​២២១នាក់បានជួយចេញពីអាគារបាក់បែក ក្នុងនោះមាន​៣នាក់ស្លាប់ គឺទារកទើបតែអាយុ​១០ខែ ម្នាក់​ ស្ត្រីអាយុ​៥៥ឆ្នាំម្នាក់ និងបុរស​អាយុ​៥០ឆ្នាំម្នាក់។ អាគារដែលបាក់បែកនោះមានគ្រួសាររស់នៅរហូត​៩២គ្រួសារ ដោយមានសមាជិកសរុប​២៥៦នាក់។
ការរញ្ជួយដីបានធ្វើឲ្យពលរដ្ឋជាច្រើនត្រូវបាត់បង់ផ្ទះសម្បែង ឬត្រូវជម្លៀសចេញទៅកាន់តំបន់មានសុវត្ថិភាព សម្រាប់អ្នកដែលរស់នៅលើអាគារឃុនដូរខ្ពស់ៗ ធ្វើឲ្យពិធីបុណ្យចូលឆ្នាំ​ឆ្នាំនេះបាត់បង់ភាពសប្បាយរីករាយ៕