ឆ្នាំណាក៏ដូចឆ្នាំណាឲ្យតែរដូវចូលឆ្នាំចិន-យួនមកដល់ នាយជាលតែងកំណត់ចំណាំឃើញថា ខ្មែរយើងមួយចំនួនដែលមានសម្បុរខ្មៅដូចក្អែក ស៊ីប្រហុកកប់ៗមាត់ និងមានសែស្រឡាយ ខ្មែរទាំងអាចម៍ ស៊ីច្រាច់ទាំងឬស ដូចនាយជាលដែរនោះ បាននាំគ្នាតាំងខ្លួនជាអ្នកមានឈាមជ័រចិន យួន ដើម្បីសែនព្រេនចូលឆ្នាំប្រពៃណីនឹងគេដែរ ។
អ្វីដែលនាយជាលបានកត់សម្គាល់នោះគឺមានអ្នកខ្លះសែនមាន់ស្ងោរ ទាខ្វៃ ជ្រូកខ្វៃ និងដុតក្រដាស ហុយសំពោងពេញមុខផ្ទះ ឯនៅពាងអង្ករឯណោះសឹងរកតែអង្ករមួយកំប៉ុងស្ងោរឲ្យកូនហុត សឹងមិនបានផង តែដោយហេតុតែចង់ឲ្យគេស្ងើចសរសើរថាខ្លួនឯងជាប់សែស្រឡាយចិននឹងគេដែរ ក៏ចេះតែប្រឹងទាំងត្រដាបត្រដួសរកលុយទិញសំណែនជាមួយគេឯងអ៊ីចឹងទៅ ។ ហ្នឹងហើយគេហៅថាចិនខ្មៅ ។
ចំណែកអ្នកខ្លះទៀត មិនដឹងជាកាត់សាសន៍អីខ្លះទេ ចូលឆ្នាំចិនក៏សែន ចូលឆ្នាំខ្មែរក៏ទៅវត្ត ចូលឆ្នាំចាមក៏សំយ៉ាំង ចូលឆ្នាំបារាំងក៏ជប់លៀង… ។ បើនិយាយឲ្យចំទៅមនុស្សធុននេះទំនងជាគាត់គិតថាចង់បានអាយុច្រើន ទើបមួយឆ្នាំចូលឆ្នាំ៣-៤ដង ព្រោះបើបូកចំនួនចូលឆ្នាំទៅពិតជាច្រើនផស់គាត់មែន។
ក៏នៅមានអ្នកខ្លះទៀតដែលនិយមចូលចិត្តផឹក មិនថាចូលឆ្នាំចាម ចិនយួន ខ្មែរ បារាំងស្អីនោះទេឲ្យតែ តែមានពិធីគឺគាត់ផឹករហូត ចូលឆ្នាំចាមក៏ផឹក ចូលឆ្នាំចិនយួនក៏ផឹក ចូលឆ្នាំខ្មែរក៏ផឹក ចូលឆ្នាំបារាំងក៏ផឹក ជប់លៀងក៏ផឹក កូនកើតក៏ផឹក ខួបកំណើតក៏ផឹក រៀបការក៏ផឹក ភ្ជុំបិណ្ឌក៏ផឹក កឋិនក៏ផឹក បុណ្យផ្កាក៏ផឹក បុណ្យខ្មោចក៏ផឹក បុណ្យ៧ថ្ងៃ ១០០ ថ្ងៃក៏ផឹក…ឲ្យតែមានពិធីគឺផឹកលេចប្រមាត់ថ្លើម។ មនុស្សជំពូកនេះគេហៅថា បិតាប្រមឹក ។ និយាយឲ្យចំទៅឲ្យតែមានកម្មវិធីគឺត្រូវតែផឹក ហើយពាក្យផឹកនេះមិនសំដៅផឹកទឹកតែ ឬទឹកបរិសុទ្ធទេ គឺផឹកគ្រឿងស្រវឹង សូម្បីម៉ែឪ បងប្អូនស្លាប់យ៉ាងហោចផឹកស្រាថ្នាំដែរព្រោះពួកគេគិតថាផឹកដើម្បីបំបាត់ទុក្ខ ។
និយាយដល់រឿងផឹក នាយជាលភ្ញាក់ខ្លួនព្រឺត ព្រោះដឹងថាពីរបីថ្ងៃនេះចំថ្ងៃចូលឆ្នាំចិនយួនល្មម សមនឹងថ្ងៃរបស់អ្នកមានចំណូលចិត្តអ្នកផឹកនេះឯង។ នាយជាលឲ្យតែមកដល់ថ្ងៃនឹងតែងបុកពោះភឹបៗ ព្រោះធ្លាប់បានដឹង បានឃើញ បានឮនឹងត្រចៀកអារឿង ចូលឆ្នាំចិនស្រវឹងខ្មែរស្អីគេនឹង មានបងប្អូនយើងគ្រោះថ្នាក់ចរាចរណ៍ស្លាប់ របួស ពិការ ច្រើនណាស់ព្រោះតែផឹកស្រវឹង។ បើបានជានិយាយដល់ហើយ នាយជាលសូមជួយដាស់ តឿនរំឮកបន្តិចទៅចុះ សូមកុំឲ្យទិវាចូលឆ្នាំចិនស្រវឹងខ្មែរក្លាយជាថ្ងៃទឹកភ្នែកដោយសារហិង្សា ឬគ្រោះថ្នាក់ចរាចរណ៍ឲ្យសោះ ។ សូមចាំពាក្យស្លោក (ស្រវឹងកុំបើកបរ បើកបរកុំស្រវឹង)។
ដោយ៖ នាយជាល
