អភិបាលក្រុង Krasnodar លោក​Yevgeny Pervyshov បានប្រកាសឲ្យដឹងថា ​លោកបានកាត់បន្ថយការសម្រាករបស់ខ្លួន​មុនពេល​បោះឆ្នោតដើម្បីមកបញ្ជាទប់ស្កាត់ភ្លើងឆេះដំបូលនៃអគារ​ខុនដូនៅទីក្រុងនេះកាលពីព្រឹកថ្ងៃទី ១៣ខែកញ្ញា​។
លោកអភិបាលក្រុងKrasnodar បានប្រកាសថា លោកបានកោះប្រជុំជាបន្ទាន់ ដល់មន្ត្រីជំនាញ
នៅវេលាម៉ោង៩ព្រឹក ស្តីពីវិធានការទប់ស្កាត់ហេតុការណ៍អាក្រក់បែបនេះកើតឡើង​។
តាមការលើកឡើងរបស់លោកYevgeny Pervyshov មិនមានអ្នកណាម្នាក់ស្លាប់ឬរបួសនៅក្នុងគ្រោះអគ្គិភ័យដ៏រន្ធត់នោះឡើយ​។ ពលរដ្ឋរស់នៅក្នុងអគារនោះត្រូវបានជម្លៀសចេញដោយសុវត្ថិភាព ។ លោកបន្តទៀតថា​ មន្ត្រីក្នុងតំបន់បានរៀបចំកន្លែងស្នាក់នៅបណ្តោះអាសន្នដល់ពលរដ្ឋ​ និងផ្តល់អាហារព្រមទាំងសម្ភារចាំបាច់​។ សណ្ឋាគារKavkaz នៅក្បែរខុនដូឆេះនោះ បានអនុញ្ញាតឲ្យបន្ទប់ស្នាក់នៅដោយឥតគិតថ្លៃ សម្រាប់អ្នករងគ្រោះ ក្នុងពេលកំពុងតែរៀបចំអគារខុនដូឡើងវិញនោះ​។
អគ្គិភ័យកើតឡើងនៅជាន់ទី​៨នៃ អគារខុនដូខាងលើ ស្ថិតនៅដងផ្លូវ​Rossiyskaya។ តាមអភិបាលក្រុងរង លោក Andrey Doroshevបានលើកឡើងថា អគារខុនដូខាងលើរងការខូចខាតយ៉ាងខ្លាំងដោយសារតែភ្លើងឆេះ។ តាមការសន្និដ្ឋានពីក្រុមជំនាញ ភ្លើង​ឆេះ​គឺបណ្តាលមកពីទុស្សេខ្សែភ្លើង៕