ភ្នំពេញ៖ ជនដែលបើកបររថយន្តបង្កគ្រោះថ្នាក់ចរាចរណ៍ឈ្មោះ មឿន ចក់ អាយុ ៣៦ ឆ្នាំ មុខរបរ អ្នកបើកបរ ដែលបណ្តាលឲ្យមនុស្ស២នាក់ស្លាប់ ត្រូវបានបញ្ជូនទៅតុលាការនៅរសៀលថ្ងៃទី១៤ ខែកញ្ញា ឆ្នាំ២០២០។ នេះបើតាមឱ្យដឹងពី លោកវរសេនីយ៍ឯក សែម រតនា នាយការិយាល័យចរាចរណ៍ផ្លូវគោក ។
លោកបានបញ្ជាក់ថា នៅរសៀលថ្ងៃចន្ទ ទី១៤ ខែកញ្ញា ឆ្នាំ២០២០ ដោយមានការបញ្ជាផ្ទាល់ពី ឧត្តមសេនីយ៍ឯក អគ្គស្នងការរង និងជាស្នងការនរបាលរាជធានីភ្នំពេញ និងមានការឯកភាពពីលោកព្រះរាជអាជ្ញាអមសាលាដំបូងរាជធានីភ្នំពេញ ជនបង្កគ្រោះថ្នាក់ចរាចរណ៍ឈ្មោះ មឿន ចក់ ភេទប្រុស ដែលបណ្តាលឲ្យមនុស្ស២នាក់ស្លាប់ កាលពីវេលាម៉ោង ២២:១០នាទីយប់ ថ្ងៃទី ១៣ ខែកញ្ញា ឆ្នាំ២០២០ នៅត្រង់ចំណុចផ្លូវលេខ ១០១៩ ប្រសព្វផ្លូវ ម៉ុងរិទ្ធី សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបានបញ្ជូនទៅតុលាការ នៅវេលាម៉ោង ១៤និង៣០ នាទីរសៀលថ្ងៃទី១៤ ខែកញ្ញា ឆ្នាំ២០២០ ដេីម្បីអនុវត្តបន្តតាមនីតិវិធីច្បាប់ ៕
ដោយ៖ សិលា
