រដ្ឋាភិបាលរបស់ប្រធានាធិបតីដូណាល់ ត្រាំបានប្រកាសពីគម្រោង លក់អាវុធឱ្យកោះតៃវ៉ាន់មានតម្លៃដល់ទៅ៧ពាន់លានដុល្លារ នៅសប្តាហ៍ក្រោយ ។ នេះជាកិច្ចព្រមព្រៀងលក់អាវុធលំដាប់ទីពីរ ដល់កោះតៃវ៉ាន់។
សារព័ត៌មានSputnikបានផ្សាយថា កិច្ចព្រមព្រៀងខាងលើ នឹងផ្តល់ឲ្យ កោះតៃវ៉ាន់នូវមីស៊ីលការពារនិងវាយលុករយៈចម្ងាយឆ្ងាយ និងយន្តហោះគ្មានមនុស្សបើក។
ចំណែកសារព័ត៌មាន Wall Street Journal បានផ្សាយថា អាវុធដែលអាមេរិកលក់ឲ្យកោះតៃវ៉ាន់រួមមាន យន្តហោះគ្មានមនុស្សបើក ប្រភេទ MQ-9B Reaper មានតម្លៃ៤០០លានដុល្លារ និងសម្ភារៈពាក់ព័ន្ធ។ ក្រៅពីនេះគឺ មីស៊ីលការពារ AGM-84H / K SLAM-ER ដែលអាចវាយប្រហារពីដីគោករយៈចម្ងាយឆ្ងាយ និងមីស៊ីលប្រឆាំងនាវាមុជទឹកប្រភេទHarpoon។
តាមសារព័ត៌មាន New York Times បានផ្សាយថា អាវុធដែលអាមេរិកលក់ឲ្យកោះតៃវ៉ាន់ គឺស្ថិតនៅឆ្ងាយពីប្រព័ន្ធការពារដែនអាកាសរបស់ចិន ។ ទាំងនោះមានន័យថា មីស៊ីលអាមេរិកលក់ឲ្យកោះតៃវ៉ាន់សម្រាប់វាយប្រហារទៅលើចិនដីគោកពេលមានសង្គ្រាមកើតឡើង។
កាលពីខែសីហា កន្លងមកទីក្រុងវ៉ាស៊ីនតោន បានបញ្ចប់កិច្ចព្រមព្រៀងផ្តល់យន្តហោះចម្បាំង ៩០គ្រឿងប្រភេទF-16V “Viper”ឲ្យកោះតៃវ៉ាន់ មានតម្លៃ៨ពាន់លានដុល្លារ។ ការលក់អាវុធឲ្យទៅកោះតៃវ៉ាន់របស់អាមេរិក និឹងធ្វើឲ្យស្ថានភាពទំនាក់ទំនងរវាងអាមេរិកនឹងចិនកាន់តែតានតឹងថែមទៀត។ តាំងពីដើមមកទីក្រុងប៉េកាំងស្នើអាមេរិកឈប់លូកដៃកិច្ចការផ្ទៃក្នុងរបស់ចិន ក្នុងនោះមានកោះតៃវ៉ាន់ដែលជាផ្នែកមួយនៃទឹកដីចិនមិនអាចកាត់ផ្តាច់បាន។ មិនតែប៉ុណ្ណោះចិនព្រមានថានឹងប្រើកម្លាំងយោធាប្រសិនបើតៃវ៉ាន់ប្រកាសឯករាជ្យ៕
