តាមសារព័ត៌មាន Times of India បានផ្សាយថា កម្លាំងទាហានឥណ្ឌានិងចិនបានព្រមព្រៀងគ្នាឈប់បញ្ជូនទាហានទៅកាន់ព្រំដែនដែលមានវិវាទ។ តំបន់ព្រំដែនប្រទេសទាំងពីរស្ថិតនៅក្នុងភាពតានតឹងជាច្រើនសប្តាហ៍កន្លងមកហើយ។
នៅក្នុងសេចក្តីប្រកាសរួម កាលពីយប់ថ្ងៃទី២២ ខែកញ្ញា ក្រោយជំនួបពិភាក្សាគ្នាតាមទូរស័ព្ទរវាងមេបញ្ជាការកងទ័ពប្រទេសទាំងពីរស្តីពីបញ្ហាព្រំដែន ភាគីទាំងពីរបានសម្រេចឈប់បញ្ជូនទាហានទៅកាន់តំបន់ព្រំដែន ។
ក្រសួងការបរទេសឥណ្ឌា បានបញ្ជាក់ទៀតថា ភាគីទាំងពីរបានពិភាក្សាគ្នាយ៉ាងលម្អិតស្តីពីវិវាទនៅតាមបណ្តោយព្រំដែន LAC ។ ភាគីទាំងពីរបានរក្សាទំនាក់ទំនងដើម្បីបញ្ចៀសការយល់ច្រឡំឈានដល់ការប្រឈមមុខតានតឹងដាក់គ្នា។ ជាមួយគ្នានេះដែរ មន្ត្រីយោធាចិន និងឥណ្ឌានឹងបន្តពិភាក្សាគ្នា ក្នុងពេលដ៏ខ្លីខាងមុខស្តីពីបញ្ហាព្រំដែន។
ក្នុងជំនួបពិភាក្សាគ្នាកាលពីថ្ងៃទី២១ ខែកញ្ញា គឺជាកិច្ចពិភាក្សាទី៦ហើយស្តីពីបញ្ហាព្រំដែន ចាប់តាំងពីការប្រឈមមុខតានតឹងនៅថ្ងៃទី៦ ខែមិថុនា ឆ្នាំ២០២០មក។
បញ្ហាព្រំដែន រវាងឥណ្ឌានិឹងចិនបានល្អប្រសើរឡើងវិញក្រោយជំនួបពិភាក្សាគ្នានៅក្នុងប្រទេសរុស្ស៊ី ។ ជាមួយគ្នានេះដែរ រដូវត្រជាក់ជិតមកដល់ ការដកទាហានចេញគឺជារឿងសំខាន់បំផុតសម្រាប់ប្រទេសទាំងពីរ៕
