ភ្នំពេញ៖ ព្រឹត្តិការណ៍ប្រកួតសម្រស់ Miss Grand Cambodia 2020ត្រូវបានបញ្ចប់ហើយកាលពីរាត្រីថ្ងៃទី២៦ ខែកញ្ញា ឆ្នាំ២០២០ដោយមានការចូលរួមទស្សនាគាំទ្រជាច្រើន។ ទន្ទឹមគ្នានេះដែរកម្មវិធីក៏ទទួលបានទាំងការកោតសរសើរ និងរិះគន់មួយចំនួនផងដែរ។

បន្ទាប់ពីទទួលបានសិទ្ធិក្នុងការរៀបចំកម្មវិធី Miss Grand Cambodia  ផលិតកម្មមហាហង្សបានរៀបចំប្រកួតជ្រើសរើសបេក្ខនារីដែលវគ្គផ្តាច់ព្រ័តមានចំនួន២៨ រូបតំណាងឲ្យខេត្តរាជធានី និងសហគមខ្មែររស់នៅក្រៅប្រទេស៣ផ្សេងទៀត។ ម្ចាស់គ្រងម្កុដ Miss Grand Cambodia 2020 បានទៅលើ កញ្ញា សេង រដ្ឋា ដែលមកពីខេត្តកំពង់ធំនិងតំណាងឲ្យខេត្តមួយនេះផងដែរ ខណៈជ័យលាភីរងទី១បានទៅលើកញ្ញា លឹម សុធារី តំណាងខេត្តព្រះសីហនុ, ជ័យលាភីរងទី២បានទៅលើកញ្ញា ជីវ ជីលី បេក្ខនារីតំណាងខេត្តបន្ទាយមានជ័យ, ម្ចាស់ជ័យលាភីរងទី៣បានទៅលើកញ្ញាវុធ ធីដាវីន ជាបេក្ខនារីតំណាងខេត្តបាត់ដំបង និងចុងក្រោយម្ចាស់ជ័យលាភីរងទី៤គឺបានទៅលើកញ្ញាសារុំ ចន្ថា ជាបេក្ខនារីតំណាងខ្មែរ–បារាំង។ យើងងាកមកមើលចំណុចល្អ និងចំណុចខ្វះខាតដែលកម្មវិធីនេះទទួលបាន

​ចំណុចលេចធ្លោរួមមានកម្មវិធី Miss Grand Cambodia 2020ត្រូវបានរៀបចំទ្រង់ទ្រាយធំផ្លូវការលើកដំបូងដែលមិនធ្លាប់រៀបចំធ្វើពីមុនមក និង បានជ្រើសរើសម្ចាស់ជ័យលាភីគ្រងម្កុដមានទាំងរូបសម្រស់ស្រស់សោភាភ្ជាប់ដោយ ចំណេះដឹងសមរម្យ។គួរឲ្យចាប់អារម្មណ៍គឺកម្មវិធីត្រូវបានបញ្ចប់ដោយជោគជ័យបើទោះបីជាស្របពេលដែលការរីករាលដាលជាសាកលនៃជំងឺកូវីដ១៩ក៏ដោយ។ អ្វីដែលគួរឲ្យសរសើរគឺ កម្មវិធីបានផ្តល់ឱកាសដល់យុវជនជាច្រើនបានចូលរួមប្រកួតបង្ហាញស្នាដៃនៃការច្នៃម៉ូតសម្លៀកបំពាក់សម្រាប់ឈុតតំណាងជាតិ ឆ្លុះបញ្ចាំងពីសក្កដានុពលនៃខេត្តរាជធានីផងដែរ។ កាន់តែពិសេសកម្មវិធី Miss Grand Cambodia 2020 បានចូលរួមចំណែកខ្លាំងក្នុងលើកកម្ពស់មុខមាត់ជាតិតាមរយៈការបង្ហាញសមត្ថភាព រូបសម្រស់ សិល្បៈវប្បធម៌ជាតិ និងសក្កដានុពលនៃតំបន់ទេសចរណ៍គ្រប់ខេត្តរាជធានី។

​​ស្របគ្នាការលើកសរសើរយើងងាកមកមើលការរិះគន់ លើកម្មវិធីប្រកួតសម្រស់ នេះវិញម្តងគឺគណកម្មការនៃការដាក់ពិន្ទុដែលមានត្រឹមតែ៥នាក់ ហើយក៏មានសមាសភាពមួយចំនួនជាសិល្បករជំនាន់ក្រោយប៉ុណ្ណោះ ហើយក៏មិនមានវត្តមានអតីតម្ចាស់ជ័យលាភី Miss Grand Cambodia ពីឆ្នាំមុនៗនោះ។មិនតែប៉ុណ្ណោះក៏មានការរិះគន់លើការរៀបចំឆាក ដែលមានភាពសមញ្ញ មិនមានភាពលេចធ្លោរពោលគឺមានតែLED ធម្មតា ។ អ្វីដែលគេរិះគន់ដែរនោះគឺកម្មវិធីប្រកួតបានធ្វើការផ្លាស់ប្តូរទីតាំងជាច្រើនកន្លែងផ្សេងពីគ្នាដែលដើមឡើយគ្រោងរៀបចំធ្វើនៅផ្សារទំនើបអ៊ីអន ក្រោយមកត្រូវបានផ្លាស់ប្តូរទៅក្នុងកបរិវេណពហុកីឡដ្ឋានជាតិអូឡាំពិច ហើយចុងក្រោយដល់ត្រូវបានប្រកាសផ្លាស់មករៀបចំធ្វើនៅអាគារ ព្រីមៀសែនសុខវិញ។ អ្វីដែលធ្វើឲ្យអ្នកទស្សនាមិនពេញចិត្តគឺពិធីករពិធីការិនី ក្នុងកម្មវិធីនេះហាក់មិនទាន់មានសមត្ថភាពគ្រប់គ្រាន់ដែលអាចជួយដឹកនាំកម្មវិធីប្រកួតលើឆាកឲ្យកាន់តែមានភាពល្អប្រសើរ។ ក៏ចាប់អារម្មណ៍លើការរិះគន់មួយទៀតគឺការបើកវគ្គប្រកួតផ្តាច់ព្រ័តដំបូងអំពីការបង្ហាញឈុតតំណាងជាតិរបស់បេក្ខនារីមិនគួរឲ្យភ្ញាក់ផ្អើល និងទាក់ទាញ ពោលបេក្ខនារីត្រូវមកឈរបង្ហាញទស្សនិកជននៅលើឆាកទាំង២៨រូបតែម្តង ខណៈបេក្ខនារីខ្លះត្រូវឈរច្រើនជាង១ម៉ោងចាប់តាំងពីការត្រៀមការផ្សាយផ្ទាល់ជាមួយនឹងគ្រឿងតុបតែងកាយធ្ងន់ស្ទើតែពិបាកទ្រាំ៕ ដោយ វឌ្ឍនា