ខេត្តកំពង់ឆ្នាំង ៖ក្មេងស្រីម្នាក់ទៅលេងទឹកស្រះនៅខាងក្រោយផ្ទះបណ្តាលឲ្យលង់ស្លាប់គ្មានអ្នកណាដឹងជួយទាន់ ខណៈឪពុកម្តាយទុកឲ្យនៅជាមួយជីដូន ហើយជីដូនជាប់រវល់ការងារផ្ទះមិនបានចាប់អារម្មណ៍មើលចៅដោយប្រុងប្រយ័ត្ន។
ហេតុការណ៍នេះបង្កការភ្ញាក់ផ្អើលប្រជាពលរដ្ឋនៅនៅថ្ងៃទី០៣ ខែតុលា ឆ្នាំ ២០២០ វេលាម៉ោង០៣និង៣០នាទីរសៀល នៅភូមិទ័ពបោះ ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង។
ប្រភពពីសមត្ថកិច្ចនគរបាលប៉ុស្តិ៍រដ្ឋបាលធ្លកវៀន បានឲ្យដឹងថាក្មេងស្រីរងគ្រោះឈ្មោះ ហាន បញ្ញា អាយុ៣ឆ្នាំ ឪពុកឈ្មោះ សេង ហឿន ម្ដាយឈ្មោះអៀម ផល្លា រស់នៅភូមិទ័ពបោះ ឃុំធ្លកវៀន ស្រុកសាមគ្គីមានជ័យ ខេត្តកំពង់ឆ្នាំង ។
សាក្សីបានឲ្យដឹងថា មុនពេលកើតហេតុ ឪពុកម្ដាយបានទៅធ្វើការនៅរោងចក្រ ទុកកូនជាជនរងគ្រោះឱ្យយាយជួយមើលថែ ។ ពេលនោះចៅនៅលេងក្រោមផ្ទះហើយយាយបានឡើងទៅយកអង្ករនៅលើផ្ទះមកអុំដាំបាយហូប ។ លុះពេលចុះមកវិញស្រាប់តែបាត់ចៅពីក្រោមផ្ទះ ហើយក៏ដើររកជុំវិញផ្ទះប៉ុន្តែមិនឃើញ គាត់ក៏ប្រើប្អូនថ្លៃគាត់ឈ្មោះ យឿង ជួយដើររក ។ ពេលនោះឈ្មោះ យឿង បានដើររកក៏ប្រទះឃើញក្មេងនោះក្លាយជាសពអណ្ដែតទឹកនៅក្នុងស្រះពីខាងក្រោយផ្ទះដែលមានចម្ងាយប្រហែល ១៥០ ម៉ែត្រពីផ្ទះ ទើបបង្កការភ្ញាក់ផ្អើលតែម្តង។
បន្ទាប់មកសមត្ថកិច្ចជំនាញបានចុះទៅធ្វើកោសល្យវិច័យហើយសន្និដ្ឋានថា កុមារីរងគ្រោះពិតជាស្លាប់ដោយលង់ទឹកប្រាកដមែនក៏ប្រគល់សពឲ្យក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ប្រាថ្នា
