អន្តរជាតិ៖ នៅថ្ងៃទី៥ ខែតុលា ឆ្នាំ២០២០នេះ មេដឹកនាំនូវែលសេឡង់ លោកស្រី Jacinda Ardern បានបង្ហាញពីទំនុកចិត្តថា រលកឆ្លងទី២នៃកូរ៉ូណាវីរុសនៅក្នុងទីក្រុងAuckland បានលុបបំបាត់ស្ទើរតែទាំងស្រុងហើយ។ បន្ទាប់ពីស្ថានភាពនេះ ធ្វើឲ្យរដ្ឋាភិបាលសម្រេចលើកចោលបម្រាមរឹតត្បិតកម្រិតបីនៅក្នុងទីក្រុង Auckland ។
នាយករដ្ឋមន្ត្រីនូវែលសេឡង់ លោកស្រី Jacinda Ardern ថ្លែងនៅក្នុងសន្និសីទសារព័ត៌មានមួយ បានលើកឡើងយ៉ាងដូច្នេះថា៖ «ពេលនេះ លទ្ធភាពនៃការឆ្លងCOVID-19 ប្រមាណ៩៥ភាគរយ ត្រូវបានលុបបំបាត់ចោល។ COVID-19 នឹងនៅជាមួយយើងជាច្រើនខែទៅមុខទៀត ប៉ុន្តែយើងគួរតែលើកចោលបម្រាមរឹតត្បិត»។ មិនតែប៉ុណ្ណោះ មេដឹកនាំនូវែលសេឡង់រូបនេះ បានសរសើរប្រជាជនដែលអនុវត្តវិធានការតឹងរ៉ឹងតាមការសម្រេចរបស់រដ្ឋាភិបាលរហូតអាចយកឈ្នះ COVID-19 ជាលើកទីពីរ។
ជាក់ស្តែង នៅក្នុងទីក្រុងAuckland រដ្ឋាភិបាលនូវែលសេឡង់ រាយការណ៍ថា មិនមានករណីឆ្លងនៅក្នុងស្រុកចំនួន ១០ថ្ងៃជាប់គ្នា។ ដោយមើលឃើញពីស្ថានភាពធូរស្រាលបែបនេះ រដ្ឋាភិបាលសម្រេចលើកចោលបម្រាមរឹតត្បិតកម្រិតបី នៅក្នុងទីក្រុង Auckland ចោល និងដាក់បម្រាមរឹតត្បិតកម្រិតមួយ ជំនួសវិញ។ ការលើកចោលនេះ នឹងធ្វើឡើងចាប់ពីថ្ងៃទី៨ ខែតុលាតទៅ។
សូមជម្រាបថា ក្រោមបម្រាមរឹតត្បិតកម្រិតមួយនេះ រដ្ឋាភិបាលហាមឃាត់មិនឲ្យជួបប្រជុំមនុស្សលើសពី១០០នាក់ឡើយ ចំណែកភោជនីយដ្ឋាន និងបារ អាចបើកធម្មតា ដោយមិនរក្សាគម្លាតសុវត្ថិភាព។ មកទល់ពេលនេះ នូវែលសែឡង់ មានករណីឆ្លងCOVID-19 សរុបចំនួន ១៨៥៥ករណី អ្នកស្លាប់មានចំនួន ២៥នាក់ និងអ្នកជាសះស្បើយមានចំនួន ១៧៩០នាក់។
ក្រោយស្ងប់ស្ងាត់១០២ថ្ងៃ ករណី COVID-19 នៅក្នុងទីក្រុងAuckland ត្រូវបានអាជ្ញាធរនូវែលសេឡង់រាយការណ៍នៅក្នុងខែសីហាកន្លងទៅ ប៉ុន្តែអ្នកឆ្លងលើកដំបូងនៅក្នុងទីក្រុង មិនត្រូវបានគេរកឃើញប្រភពចម្លងនៅឡើយទេ បើទោះបីជាអាជ្ញាធរដាក់ការសង្ស័យលើឃ្លាំងក្លាសេមួយកន្លែងក៏ដោយ។ ព្រោះកន្លងមករដ្ឋាភិបាលបានបន្ធូរបន្ថយបម្រាមរឹតត្បិតនៅទូទាំងប្រទេសទាំងអស់មកកម្រិតមួយលើកលែងតែទីក្រុងAuckland មួយប៉ុណ្ណោះ ដែលនៅតែរក្សាកម្រិតបី ព្រោះលទ្ធភាពនៃការឆ្លងមានខ្ពស់ជាងតំបន់ផ្សេង។
គួរបញ្ជាក់ថា ប្រសិនគ្មានការប្រែប្រួលទេ នូវែលសេឡង់ ក៏នឹងរៀបចំការបោះឆ្នោតសភា នៅថ្ងៃទី១៧ ខែតុលាខាងមុខនេះ បន្ទាប់ពីពន្យារពេលជាច្រើនថ្ងៃ និងសភាត្រូវបានរំលាយ៕ ដោយ៖ស តារា
