មានហេតុការណ៍ផ្ទុះឃ្លាំងអាវុធមួយនៅតំបន់Ryazan ភាគអាគ្នេយ៍ទីក្រុងមូស្គូ ដែលក្នុងនោះមានគ្រាប់រំសេវដល់ទៅ៧៥.០០០តោន កាលពីថ្ងៃទី៧ខែតុលា ។ ក្រុមសន្តិសុខរុស្ស៊ីបានជម្លៀសពលរដ្ឋ ជាង២ពាន់នាក់រស់នៅក្នុងភូមិមួយជិត តំបន់Ryazan ទៅកាន់ទីតាំងសុវត្ថិភាព។
អណ្តាតភ្លើងបានឆាបឆេះឃ្លាំងគ្រាប់ នៅល្ងាចថ្ងៃទី៧ ខែតុលា (ពេលវេលាក្នុងតំបន់) ហើយក្រុមពន្លត់អគ្គិភ័យជាង៤០០នាក់បានខិតខំគ្រប់គ្រងស្ថានភា។ មន្ត្រីក្នុងតំបន់បានឲ្យដឹងថា មានមនុស្ស ៥នាក់រងរបួសក្នុងហេតុការណ៍នេះ។
ក្រសួងគ្រប់គ្រងគ្រោះអាសន្នរុស្ស៊ីបានឲ្យដឹងថា អណ្តាតភ្លើងបានឆាបឆេះនៅវាលស្មៅក្បែរនោះ ហើយបានរាលដាលទៅដល់ឃ្លាំងគ្រាប់បណ្តាលឲ្យគ្រាប់រំសេវផ្ទុះឡើងជាបន្តបន្ទាប់។ ការផ្ទុះឆេះបណ្តាលឲ្យអណ្តាតភ្លើងនិងផ្សែងគ្របដណ្តប់ក្នុងតំបន់។ គណៈកម្មការស្រាវជ្រាវ និឹងបើកការស៊ើបអង្កេតបទឧក្រិដ្ឋ ពាក់ព័ន្ធនឹងការគ្រប់គ្រងមិនបានល្អ ។
នៅល្ងាចថ្ងៃទី៧ ខែតុលា ក្រសួងគ្រប់គ្រងគ្រោះអាសន្នបានបញ្ជូន ក្រុមពន្លត់អគ្គិភ័យបន្ថែមពីក្រុងមូស្គូ ទៅចូលរួមគ្រប់គ្រងស្ថានភាព។ រដ្ឋមន្ត្រីគ្រប់គ្រង គ្រោះអាសន្នYevgeny Zinichev បានទៅកាន់កន្លែងកើតហេតុដោយផ្ទាល់ដើម្បីត្រួតពិនិត្យស្ថានភាព ។
មន្ត្រីក្នុងតំបន់បានឲ្យដឹងថា មានពលរដ្ឋក្នុងតំបន់ប្រមាណ២៣០០នាក់ត្រូវបានជម្លៀសទៅកាន់តំបន់មានសុវត្ថិភាព នៅចម្ងាយពីទីតាំងផ្ទុះដល់ទៅ៥ គីឡូម៉ែត្រ៕
