អន្តរជាតិ៖ ជនជាតិចិន៦០នាក់ និងទូកនេសាទ៦គ្រឿង បន្ទាប់ពីលួចបើកចូលដែនទឹកដោយគ្មានការអនុញ្ញាត ក៏ត្រូវបានអាជ្ញាធរលំហសមុទ្រម៉ាឡេស៊ី ចាប់ឃាត់ខ្លួន កាលពីថ្ងៃទី ១០ ខែតុលា ឆ្នាំ២០២០ ។
បើតាមការចុះផ្សាយរបស់ទីភ្នាក់ងារព័ត៌មាន Reuters បាននិយាយថា ទីភ្នាក់ងារអនុវត្តលំហសមុទ្រម៉ាឡេស៊ី (MMEA) គូសបញ្ជាក់ថា ទូកនេសាទចិននិងមនុស្សលើនោះ ត្រូវបានឃាត់ទុកក្នុងប្រតិបត្តិការនៅឆ្នេរសមុទ្រភាគខាងត្បូងរដ្ឋ Johor កាលពីថ្ងៃទី៩ ខែតុលា។
បើតាមលោក Mohd Zulfadli Nayan បានលើកឡើងនៅក្នុងសេចក្តីថ្លែងការណ៍ថា៖ ក្រោយការត្រួតពិនិត្យ ទូកនេសាទទាំង៦គ្រឿងនេះបានចុះឈ្មោះនៅក្នុងខេត្ត Qinhuangdao នៃប្រទេសចិន ហើយមានមនុស្សលើនោះ៦០នាក់ ។ ពួកគេសុទ្ធតែជនជាតិចិន ដែលមានអាយុចន្លោះពី៣១ឆ្នាំ និង៦០ឆ្នាំ។
ទីភ្នាក់ងារអនុវត្តលំហសមុទ្រម៉ាឡេស៊ី (MMEA) បានបញ្ជាក់ថា ទូកនេសាទនេះ គ្មានដឹកទំនិញអ្វីលើនោះឡើយ នៅពេលអាជ្ញាធររឹបអូសហើយមានទិសដៅឆ្ពោះទៅកាន់ប្រទេសនៅតំបន់អាហ្វ្រិក ម៉ូរីតានី។
បើតាមអាជ្ញាធរម៉ាឡេស៊ី ព្រោះតែទូកនេសាទទាំងនោះទៅមុខលែងរួច ដោយសារមានបញ្ហាម៉ាស៊ីន។
សូមជម្រាបថា កាលពីដើមឆ្នាំ២០២០នេះ នាវាស្រាវជ្រាវចិនមួយគ្រឿង បានចំណាយពេល១ខែពេញប្រតិបត្តិការសិក្សាស្រាវជ្រាវក្នុងតំបន់សេដ្ឋកិច្ចផ្ដាច់មុខ (EEZ) របស់ម៉ាឡេស៊ី ទោះកំពុងប្រឈមមុខជាមួយរដ្ឋាភិបាលម៉ាឡេស៊ីពាក់ព័ន្ធនឹងនាវារុករកប្រេងម៉ាឡេស៊ីមួយគ្រឿងនៅក្បែរសមុទ្រជម្លោះ។
គួរបញ្ជាក់ថា ប្រទេសម៉ាឡេស៊ី បានរាយការណ៍ករណីលួចឆ្លងចូលដែនទឹកម៉ាឡេស៊ីពីសំណាក់នាវាចម្បាំងនិងនាវាល្បាតចិនចំនួន៨៩លើកហើយ ចន្លោះពីឆ្នាំ២០១៦ និងឆ្នាំ២០១៩ ក្នុងបរិបទនៃភាពតានតឹងដែលកំពុងកើនឡើងរវាងសហរដ្ឋអាមេរិកនិងចិនជុំវិញការទាមទារស្ទើរទាំងស្រុករបស់ក្រុងប៉េកាំងក្នុងសមុទ្រចិនខាងត្បូង ដែលពោរពេញដោយធនធានធម្មជាតិ និងជាផ្លូវទឹកពាណិជ្ជកម្មដ៏សំខាន់៕ដោយ៖ស តារា
